මෙරට ඉතිහාසයේ සුවිශාලතම ආයෝජනය වන ඇමරිකානු ඩොලර් මිලියන 700 ක ආයෝජනය ශ්‍රි ලංකා වරායේ බටහිර පර්යන්තය වෙනුවෙන් ලබා ගැනීමට හැකි වූ බවත් එම ආයෝජනය තුළින් බටහිර ජැටියේ ඉදිකිරීම් කටයුතු 2024 අවසන් කර ශ්‍රි ලංකා ආර්ථිකයට එක් කිරීමට හැකි වනු ඇති බවද අමාත්‍ය රෝහිත අබේගුණවර්ධන මහතා පවසයි.
අමාත්‍යවරයා මේ බව පැවසුවේ ශ්‍රීලංකා පොදුජන පෙරමුණ පක්ෂ මූලස්ථානයේ අද (04) පැවති ප්‍රවෘත්ති සාකච්ඡාවට එක්වෙමිනි.
එහිදි අමාත්‍ය රෝහිත අබේගුණවර්ධන මහතා “පහුගිය සතිය තුළ ලංකාවට ගෙනාපු විශාලතම ආයෝජනය ඇමරිකානු ඩොලර් මිලියන 700 ශ්‍රි ලංකා වරාය අධිකාරියේ බටහිර පර්යන්තය වෙනුවෙන් අපි ඒ ගිවිසුම් අත්සන් තැබුවා. 2005 සිට 2015 මහින්ද රාජපක්ෂ ජනාධිපතිතුමාගේ රජය යටතේ අපේ ශ්‍රි ලංකා වරායට තිබුණේ ජේ.සි ටී පර්යන්තය පමණයි. ජේ.සිටී පර්යන්තයට ලංකාවේ විශාල නෞකා අපිට ඇතුල් කරගත හැකි වුණේ නෑ. මහින්ද රාජපක්ෂ මැතිතුමා විශේෂයෙන්ම මේ වරාය ක්ෂේත්‍රයේ හොඳ ස්ථාවරයක් ලබා ගත්තා. පළමුව ඩොලර් මිලියන 400 ක් ඒ වගේම ආසියානු සංවර්ධන බැංකුවෙන් ණය ලබාගෙන අපි පළවෙනි දියකඩනය ඉදි කරන්න හැකි වුණා. එයින් පසු තමයි පර්යන්ත තුනක් හැඳිමේ වගකීම පැවරෙන්නේ. ඒ පර්යන්ත තුනෙන් 2015 යහපාලන ආණ්ඩුව භාර ගන්න අවස්ථාවේ නැගෙනහිර පර්යෙන්තයේ කොටසක් අවසන් කර තිබුණා. යහපාලන ආණ්ඩුව පැමිණියා විතරයි පර්යන්තයේ එක අඩියක් අවුරුදු 05 තුළ ඉදිකිරීම් කළේ නෑ. ඉන් අනතුරුව තමයි අපි නැවතත් නැගෙනහිර පර්යන්තය ශ්‍රි ලංකා වරාය අධිකාරිය විසින්ම තව ඇමරිකානු ඩොලර් මිලයන 600 ක් වියදම් කරමින්, දොබකර 12 ක්, පර්යන්තය 2024 අවුරුද්ද වන විට අංග සම්පූර්ණ නැගෙනහිර පර්යන්තයක් බවට අවසන් කර මෙහෙයුම් කරන්න බලාපොරොත්තු වෙනවා. එසේම බටහිර පර්යන්තය විශේෂයෙන් අදානි සමාගම සමඟ 51% , ජෝන් කීල්ස් සමාගම 34% ක් ශ්‍රි ලංකා වරාය අධිකාරියට 15% ක අයිතියක් තිබෙනවා. මේ තුළින් අවුරුදු 35 ට පසු මේ පර්යන්තයේ සම්පූර්ණ අයිතිය ශ්‍රි ලංකා වරාය අධිකාරිය සතු වෙනවා. එසේම අපි බටහිර පර්යන්තයේ 2024 අගභාය වනකොට මේ පර්යන්තයෙත් වැඩ අවසන් කරන්න බලාපොරොත්තු වෙනවා. බටහිර පර්යන්තයේ වැඩ අවසන් කරාට පස්සේ මිලියන 3.5 ක ලක්ෂ 35ක බහලුන් මෙහෙයුමක් අපිට කරන්න පුළුවන්. ලක්ෂ 35ක බහලුම් ප්‍රති අපනයනය කිරීම තුළ විශාල මුදලක් අපිට ලැබෙනවා. මේ සියලු ව්‍යාපාරය කරන්නේ ශ්‍රි ලංකා වරාය අධිකාරිය. අපි මෙයින් සිදු කරන්නේ දේශීය හා විදේශීය ආයෝජනයක් සිදු කරන්නේ. ඉතින් එය දැකලා විපක්ෂය අද මේ පිළිබඳව විවේචනය කරනවා. කරුණාකරලා රටට අහිතකර විදිහට කරුණුකාරනා නොදැන කතා කරන්න එපා කියලා විපක්ෂයට කියනවා. හම්බන්තොට වරාය ආනයනය ප්‍රති අපනයන ක්‍රියාත්මක වුණා. ඒ වරාය තමයි පහුගිය යහපාලන ආණ්ඩුව 99 අවුරුදු බද්ධකට සම්පූර්ණයෙන්ම දිලා විකුණලා කෑවේ. පැහැදිලිව කියනවා අපි යුතුකම් වගකීම දන්නවා. මේක රටට වටිනා ඉතාමත් හොඳ ආයෝජනයක්. මේ රටේ යම් බිම් අගලක් අපි විකුණලා තියෙනවා ද කියලා පෙන්වන්න. ආයෝජනය හදුනා ගන්න, විකිණීම හදුනා ගන්න.රටේ මිනිස්සුන්ට නැති රකුසෙක් බිහි කරන්න එපා. අද රට හොඳ තත්වයට යමින් තිබෙනවා. කොවිඩ් තත්වය පහළට අඩු වෙන අතරම මරණ අනුපාතය අඩු වෙනවා. 2022 වර්ෂය වනවිට සංචාරක ව්‍යාපාරය දියුණු කරන්න හැකි වෙනවා. විශේෂයෙන්ම අපේ අපනයන ක්ෂේත්‍රය ඉතා ඉහළ අගයක් ගන්නවා. 2022 අවුරුද්ද වන විට රජයක් හැටියට අපි මේ රටේ ආර්ථිකය ගොඩනංවන , රට ආරක්ෂා කිරීමේ වැඩපිළිවෙල අපි ක්‍රියාත්මක කරනවා.”යැයි රෝහිත අබේගුණවර්ධන මහතා පැවසිය.
