සංරක්ෂිත වනාන්තරයක් වන ජාතික නාමල් උයන ආරක්ෂා වී තිබෙන්නේ පූජ්‍ය වනවාසි රාහුල හිමියන්ගේ අපමණ කැපවීම හා ධෛර්ය මත බව අග්‍රාමාත්‍ය මහින්ද රාජපක්ෂ මහතා පවසයි.
අග්‍රාමාත්‍යවරයා මේ බව පැවසුවේ පසුගිය 18 වනදා ජාතික නාමල් උයන 31වැනි සංවත්සර සැමරුම හා ජාතික නාමල් උයන ජාත්‍යන්තර පාරිසරික සංවිධානයේ සමාරම්භක අවස්ථාවට එක්වෙමිනි.
ජාතික නාමල් උයන නිර්මාතෘ පූජ්‍ය වනවාසි රාහුල හිමියෝ මෙහි දී ජාතික නාමල් උයන ජාත්‍යන්තර පාරිසරික සංවිධානයේ ගෞරවනීය සමාජිකත්වය අග්‍රාමාත්‍ය මහින්ද රාජපක්ෂ මහතා වෙත පිරිනැමූහ. අනතුරුව අග්‍රාමාත්‍යවරයාගේ සුරතින් මෙම ජාත්‍යන්තර පාරිසරික සංවිධානයේ නව වෙබ් අඩවිය එළි දැක්විණි.
ඒහිදී අග්‍රාමාත්‍ය මහින්ද රාජපක්ෂ මහතා කළ සම්පූර්ණ කතාව මෙසේය.
” ශ්‍රී ලංකාවේ විශාලම නා වනය හා දකුණු ආසියාවේ විශාලම රෝස තිරුවානා කඳු වැටිය පිහිටලා තියෙන්නේ මේ ජාතික නාමල් උයනේ. එවැනි වටිනා උරුමයන් අපේ මව්බිමේ තියෙන එක ගැන ඇත්තටම අපි සතුටු වෙන්න ඕන.
අක්කර 2000ක් පමණ විශාල මේ භුමිය තුළ ක්‍රි.පූ. 03 වන සියවසේ දේවානම්පියතිස්ස රජ සමයේ අනුරාධපුර යුගයේ පෞරාණික නටඹුන් රාශියක් දකින්න පුළුවන්. ඒ වගේම 4 වන දප්පුල රජතුමාගේ කාලේ මේ නා උයන මිනිසුන් සඳහා වෙන්වූ අභය භුමියක් බවට පත් කළ බව ටැම් ලිපියක සඳහන් වෙනවා.
අපේ ජාතික වෘක්ෂය ලෙස නම් කළ නාගසට අමතරව පක්ෂීන් වර්ග 18 ක් පමණ මෙන්ම ඖෂධීය ශාක 72 ක් පමණ මෙම උයනේ පිහිටා තිබීම විශේෂයක්.
මිහිකත අපට සම්පත් ලබා දී තියෙන්නේ මිනිසුන්ගේ වගේම සත්ත්වයින්ගේ පැවැත්ම වෙනුවෙන් බව කියන්න ඕනෙ.
නමුත් මිනිසා තමන්ගේ දියුණුවත් එක්ක ඇළට දොළට, ගහට වැලට, සතා සීපාවාට කර ඇති හානිය සුළු පටු නැහැ.
ඒ නිසාම ස්වභාව ධර්මය ද විටින් විට මිනිස්සුන්ට විවිධ තර්ජන හා බාධා එල්ල කරනවා. මේවායින් මිදෙන්න නම් ස්වභාව ධර්මයට අප දැඩිසේ ආදරය කරලා පෝෂණය කරලා රැකගන්න ඕනෑ.
එසේ රැකගත යුතු ඓතිහාසික පුරාවිද්‍යා සහ පාරිසරික වැදගත්කමක් තියෙන ජෛව විවිධත්වයෙන් යුතු ඉතා වැදගත් පාරිසරික කලාප අපේ රටේ තියෙනවා.
ඒවා රැක ගැනීම සඳහා කැපවෙලා ඉන්න පරිසරවේදියෙකුත් අපට ඉන්නවා. ඒ තමයි ගෞරවනීය වනවාසී රාහුල ස්වාමීන්වහන්සේ.
සංරක්ෂිත වනාන්තරයක් වන මෙම නාමල් උයන වනවාසි පූජ්‍ය අපේ රාහුල නාහිමියන්ගේ අපමණ කැපවීම හා ධෛර්ය මත ආරක්ෂාවෙලා තියෙනවා.
උන්වහන්සේ පරිසරයට ආදරය කරන හිමිනමක්, ඒ වාගේම උන්වහන්සේ හරිම සංවේදී යි. තමන්ගේ පණ රකිනවා වගෙයි උන්වහන්සේ මේ නාමල් උයනත් රෝස තිරුවානා නිධියත් ආරක්ෂා කරන්නේ.
උන්වහන්සේ වසර 31 කට වැඩි කාලයක් පුරා තම දිවි පරදුවට තියලා විවිධ අභියෝග තර්ජන මැද ඉටු කරන මේ ජාතික වගකීමට පරිසරයට ලැදි ලෝ වැසි සියලු දෙනාගේ ගෞරවය හිමිවිය යුතුයි. උන්වහන්සේ මා සමඟ ඉතාම මිත්‍රශිලීව කටයුතු කරනවා.
ඒ නිසාම මම ජනාධිපති වෙලා ඉන්න කොටත් ඊට පෙරත් තුන් වතාවක් මේ පුණ්‍ය භූමියට ගිහිල්ල අපේ හාමුදුරුවො බැහැදැකලා තියෙනවා. ඒ වගේම මටත් අපේ දරුවන්ටත් නිරන්තරයෙන් අවවාද උපදෙස් ආශිර්වාද කරන බවත් මම සඳහන් කරන්න ඕන.
අපේ හාමුදුරුවෝ කරන මේ ඓතිහාසික භාරධුර වගකීම අපේ උපන් නූපන් දරු පරපුර වෙනුවෙන් කරන යුතුකමක් ලෙසයි මම දකින්නේ.
උන්වහන්සේ මෙම ජාතික නාමල් උයන මධ්‍යම සංස්කෘතික අරමුදලට පැවරීමෙන් කළේ ඉතාම ආදර්ශ සම්පන්න කටයුත්තක්. එයින් නියම භික්ෂූන් වහන්සේ නමක් ලෙස තමන් සතු දෙයක් අන්සතු කිරීමක් උන්වහන්සේ සිදු කළේ.
ඒ වාගේම ජනාධිපති හරිත සම්මානයත් උන්වහන්සේට ලැබුනේ මේ ආදර්ශ සම්පන්න ක්‍රියාව නිසා බව මම මේ වෙලාවේ දී සිහිපත් කරන්න කැමතියි. රජයක් ලෙස භික්ෂූන් වහන්සේ නමකට මෙම ජනාධිපති හරිත සම්මානය පිරිනැමූ පළමු අවස්ථාව කියලයි මම හිතන්නේ.
ත්‍රෛනිකායික මහ සඟරුවනත් අපේ හාමුදුරුවන්ගේ ක්‍රියාව බොහෝ සේ ඇගයීමට ලක්කළා.
පරිසර සංරක්ෂණවේදීන් ද විශාල පිරිසක් උන්වහන්සේට අවශ්‍ය සහය ලබාදෙන බව මම දන්නවා. ඒ අයගේ උපරිම සහයත් මෙය ආරක්ෂා කිරීමට ලැබීම සතුටට කරුණක්.
විශේෂයෙන් මේ ජාතික නාමල් උයන 31 වන සංවත්සරය සමරණ අවස්ථාවේ රජය හැටියට අපි බැදී සිටිනවා පරිසරය, ගහකොළ ඇතුලු සතා සීපාවා ආරක්ෂා කිරීමට.
අතිගරු ජනාධිපතිතුමාගේ පරිසර සංරක්ෂණ වැඩ පිළිවෙලේ ද මෙය සඳහන් කරුණක්.
රාහුල හාමුදුරුවන් වසර 30 ට වැඩි කාලයක් කළ කැපවීම අතිශය අගය කළ යුතු බව මා ප්‍රකාශ කරන්න කැමතියි. ඒ වාගේම කිසිම ලාභ අපේක්ෂාවක් නොමැතිව කටයුතු කරන උන්වහන්සේ සෘජු පටිපන්න ගුණයෙන් යුක්ත හිමිනමක්.
යමෙකුට යමක් කීමට ඇත්නම් එය නිර්භයව උන්වහන්සේ ප්‍රකාශ කරනවා. රජයක් ලෙස මෙහි සංවර්ධනය සඳහා යමක් සිදුවිය යුතුනම් එය අපි අනිවාර්යෙන්ම ඉටු කිරීමට ක්‍රියාකරන බව මෙම මොහොතේ මා සිහිපත් කරන්නේ ඉතාම සතුටින්.
ඒ වගේම අපේ රට වෙනුවෙන් අපේ හාමුදුරුවන්ට තව විශාල සේවාවක් කිරීමට හැකි බව මා තරයේ විශ්වාස කරනවා.
එම සේවාව ඉතා හොඳින් ඉටු කිරිමට අවශ්‍ය කායික හා මානසික ශක්තියත්, නිදුක් නිරෝගී භාවයත්, දීර්ඝායුෂත් අපේ රාහුල හාමුදුරුවන්ට ලැබේවා! යි මම මෙත් සිතින් ප්‍රාර්ථනා කරනවා. තෙරුවන් සරණයි! අග්‍රාමාත්‍යතුමා පැවසීය.
මෙම අවස්ථාවට අමාත්‍ය නාමල් රාජපක්ෂ, රාජ්‍ය අමාත්‍ය විදුර වික්‍රමනායක, හිටපු කථානායක කරු ජයසූරිය, අග්‍රාමාත්‍ය අතිරේක ලේකම් හර්ෂ විජේවර්ධන, ජනාධිපති මාධ්‍ය ප්‍රකාශක කිංස්ලි රත්නායක මහත්වරු ඇතුළු පිරිසක් එක්ව සිටියහ..
