මෙරට සහල් හිඟයට විසඳුමක් ලබාදීම සඳහා ඉන්දියාවෙන් ආනයනය කරන ලද සහල් තොගයෙන් බහලුම් 10 ක් පමණ මේ වන විට සහල් පිටි නිෂ්පාදනය කිරීම සඳහා මහා පරිමාණ සහල් පිටි ආශ්‍රිත නිෂ්පාදන ආයතනවලට අලෙවි කර ඇතැයි වෙළෙඳ අමාත්‍යාංශයේ ආරංචිමාර්ග කියයි.
මේ අනුව දළ වශයෙන් සහල් කිලෝග්‍රෑම් ලක්ෂ දෙක හමාරකට අධික ප්‍රමාණයක් මෙලෙස සහල් පිටි නිෂ්පාදනය කිරීම සඳහා පුද්ගලික ආනයනකරුවන් විසින් සහල් පිටි ආශ්‍රිත නිෂ්පාදන ආයතනවලට අලෙවි කර තිබේ.
ඉන්දියාවේ සිට මෙරටට සහල් ආනයනය කිරීමේදී කිලෝවකට රුපියල් 65 ක බදු මුදලක් අය කෙරෙන බැවින්, ආනයනික සහල් සඳහා පනවා තිබෙන පාලන මිලට සහල් අලෙවි කිරීමෙන් විශාල ලාභයක් නොමැති නිසා, මෙලෙස සහල් පිටි ආශ්‍රිත නිෂ්පාදන සඳහා ආනයනික සහල් අලෙවි කෙරෙන බවද පැවසේ.
වරායෙන් සහල් තොග නිදහස් කර ගැනීමෙන් පසු ඒවා වෙළෙඳ පොළට නොයවා සහල් පිටි ආශ්‍රිත නිෂ්පාදන කර්මාන්තශාලාවලට එම බහාලුම් යැවීමට ආනයනකරුවන් කටයුතු කළද, ඊට විරුද්ධව පියවර ගැනීමේ හැකියාවක් නොමැති බවද වෙළෙඳ අමාත්‍යාංශය කියයි.
