බාල වයස්කාර පාසල් දැරියක සමූහ දූෂණයට ලක්කිරීමේ චෝදනාවක් සම්බන්ධයෙන් සිසුන් 07 දෙනෙකු හෝමාගම පොලීසිය විසින් අත්අඩංගුවට ගෙන තිබෙනවා.
අදාළ සිදුවීමට පත් එම දැරියගේ පෙම්වතා බව කියන පාසල් සිසුවා සහ තවත් පාසල් සිසුන් 5 දෙනෙකු ඇතුළු හත් දෙනෙකුයි මෙලෙස අත්අඩංගුව ගෙන තිබෙන්නේ.
කෙසේ වෙතත් මෙම සමූහ දුෂණයට ලක් දැරිය හෝමාගම මූලික රෝහලට ඇතුළත් කර වෛද්‍ය පරීක්‍ෂණයකට ලක් කිරීමට කටයුතු කළ බව පොලීසිය පවසනවා
එසේ දූෂණයට ලක් වූ එම දැරියගේ දෙමාව්පියන් විසින් දැරිය සමග පොලීසියට පැමිණ සිදුකළ පැමිණිල්ලක් අනුව මෙම සැකකරුවන් අත්අඩංගුවට ගැනීමට පොලීසියට හැකිව තිබෙනවා.
මව්පියන් රවටමින් උපකාරක පන්තියකට සහභාගි වෙන බව පවසා තම පෙම්වතා හමුවීමට ගොස් ඇති මෙම දැරියව සැකකාර පෙම්වතා බව කියන සිසුවා විසින් දැරිය රැගෙන ගොස් ඔහුගේ මිතුරෙකු සිටින හෝමගම ප්‍රදේශයේ නිවසකට ගොස් එම නිවසේදී දැරිය දූෂණයට ලක්කර තිබෙනවා.
එමෙන්ම උදෑසන 9ත් සවස 3ත් අතර පැය හයක කාලයක් ඇතුළත තවත් නිවාස තුනකට රැගෙන ගොස් මෙම දැරියව පෙම්වතා ඇතුළු ඔහුගේ මිතුරන් විසින් වරින්වර බරපතළ ලිංගික අපයෝජනය ලක් කර ඇති බව විමර්ශනයේදී අනාවරණය වූ බව පොලීසිය සදහන් කර සිටිනවා.
පොලීසිය පවසන පරිදි මෙලෙස අත්අඩංගුවට ගෙන ඇත්තේ හෝමාගම ප්‍රදේශයේම පාසල්වල ඉගෙනුම ලබන එම ප්‍රදේශයේම පදිංචිකරුවන් වන අතර, ඔවුන්ගෙන් පාසල් සිසුන් පස්දෙනා අවුරුදු 15ත් 16ත් අතර වයස්වල සිටින අතර, අනෙක් දෙදෙනා අවුරුදු 17ත් 19ත් අතර වනවා.
සැකකරුවන් විසින් පාසල් දැරිය ප්‍රවාහනයට යොදාගත් යතුරුපැදියක් ද අත්අඩංගුවට ගෙන ඇති අතර, අත්අඩංගුවට ගත් සැකකරුවන් හත්දෙනා හෝමාගම මහේස්ත්‍රාත් අධිකරණය වෙත අද ඉදිරිපත් කිරීමට නියමිත බවයි වැඩි දුරටත් වාර්තා වන්නේ
