හබරණ හිරිවඩුන්න ප්‍රෙද්ශයේදී සිමෙන්ති ප්‍රවාහනය කරමින් තිබූ කන්ටේනර් රථයක අලි පැටවකු ගැටීමෙන් අද(27) උදෑසන සිදුවූ අනතුරකින් වයස අවුරුදු 10ක් පමණ වන වනඅලිපැටවකු මිය ගොස් ඇතැයි හබරණ පොලිසිය පවසයි.
වනඅලි පැටවකු මරණයට පත් කළ මෙම අනතුරට සම්බන්ධ කන්ටේනර් රථය හා එහි රියදුරු මේ වනවිට හබරණ පොලිස් ස්ථානය මඟින් අත්අඩංගුවට ගෙන තිබේ.
හබරණ දඹුල්ල මාර්ගයේ හිරිවඩුන්න පාසැල ආසන්නයේදී මෙම අනතුර සිදුව තිබේ. කන්ටේනර් රථයේ ගැටුනු අලි පැටවා එම අනතුරෙන් බරපතළ තුවාල ලබා තිබිණ. වනජිවී නිලධාරීන් විසින් අනතුරට ලක්ව බරපතළ තත්වයේ සිටි වන අලි පැටවාට අවශ්‍ය මූලික ප්‍රතිකාර ලබා දෙමින් සිටියදි අද පෙරවරුවේ එම වන අලි පැටවා මරණයට පත්වූ බව වනජීවී නිලධාරීහු පවසති.
මෙලෙස අනතුරට අලක්ව මිය ගොස් ඇත්තේ හබරණ, හිරිවඩුන්න වැවට ජලය පානය කිරීමට පැමිනී වන අලි රංචුවක සිටි වයස අවුරුදු 10ක් පමණ අලිපැටවකු බව වනජීවී නිලධාරීන්සිදුකළ මූලික විමර්ශන වලදී අනාවරණය වී තිබේ.
අනතුර සම්බන්ධයෙන් පොලිස් අත්අඩංගුවට ගෙන ඇති රියදුරු කැකිරාව ප්‍රෙද්ශයේ පදිංචි අයෙකු බව හබරණ පොලිසිය කියයි.
හබරණ පොලිසිය හා මින්නේරිය වනජීවී කාර්යාලය මෙම අනතුර සම්බන්ධයෙන් වූ වැඩිදුර විමර්ශන සිදුකරයි.
