ලුණු ආනයනය සඳහා රජය ලබාදුන් කාලසීමාව ඉක්මවා මෙරටට ගෙන්වන ලද ලුණු අඩංගු බහාලුම් දහසකට අධික සංඛ්යාවක් මාස හයකට වැඩි කාලයක් තිස්සේ වරාය ගුදම් තුළ සිරවී පවතින බව අනාවරණය වේ. මීට අමතරව ප්රමිතියෙන් තොර සහ ශ්රී ලංකා ප්රමිත ආයතනයේ අනුමැතිය ප්රමාද වීම හේතුවෙන් තවත් ලුණු බහාලුම් 700කට ආසන්න ප්රමාණයක් රේගුවේ ස්ථාන කිහිපයක සිරවී ඇති බව වාර්තා වේ.
පසුගිය වසරේ මෙරට පැවති ලුණු හිඟයට විසඳුමක් ලෙස පෞද්ගලික අංශයට ලුණු ආනයනය කිරීමට රජය අවසර ලබා දුන් අතර, ඒ සඳහා නිකුත් කළ ගැසට් නිවේදනයට අනුව අදාළ තොග පසුගිය ජුනි 10 වනදාට පෙර මෙරටට ගෙන්විය යුතුව තිබුණි. කෙසේ වෙතත් ආනයනකරුවන් එම කාලසීමාව ඉක්මවා ලුණු ගෙන්වීම හේතුවෙන් මෙම තදබදය හටගෙන තිබේ. රේගු මාධ්ය ප්රකාශක චන්දන පුංචිහේවා මහතා සඳහන් කළේ අදාළ ගැසට් නිවේදනයට අනුව රේගුව කටයුතු කරන බවත්, මෙම තොග ප්රතිඅපනයනය කරන ලෙස දැනුම් දුන්නද ආනයනකරුවන් ඒ සඳහා කටයුතු කර නොමැති බවත්ය.
මේ සම්බන්ධයෙන් අදහස් දැක්වූ වරාය අධිකාරියේ සභාපති සිරිමෙවන් රණසිංහ මහතා ප්රකාශ කළේ පවතින ගැටලුව විසඳීම සඳහා මේ වන විට සාකච්ඡා පවත්වමින් සිටින බවයි. මේ අතර, එක් ආනයනික සමාගමක් මෙම ගැටලුව සම්බන්ධයෙන් අධිකරණය හමුවේ නඩුවක් ද ගොනු කර තිබේ.
වරායේ පවතින මෙම බහාලුම් තදබදය හේතුවෙන් මෙහෙයුම් කටයුතුවලට සිදුවන බාධා අවම කරගැනීමට පියවර ගන්නා ලෙස වරාය සහ සිවිල් ගුවන් සේවා අමාත්ය අනුර කරුණාතිලක මහතා නිලධාරීන්ට උපදෙස් දී ඇත. ඒ අනුව රේගු අධීක්ෂණය යටතේ බ්ලූමැන්ඩල් අංගනය භාවිත කරමින් නිෂ්කාශන කටයුතු වේගවත් කිරීමට ද තීරණය කර තිබේ.
