අද කාලයේ ආරක්ෂාව වෙනුවෙන් CCTV කැමරාවක් සවි කිරීම සාමාන්ය දෙයක් වුවත්, බොහෝ දෙනෙක් නොදන්නා කරුණ නම් “මගේ ආරක්ෂාව අනුන්ගේ පෞද්ගලිකත්වයට ඉහළින් නොසිටිය යුතු බවයි.” ඔබේ අසල්වැසියාගේ කැමරා කාචය ඔබේ මිදුලට හෝ නිදන කාමරයට එබිකම් කරනවා නම්, එය නිකම්ම අසල්වැසි ආරවුලක් නොව නීතිමය වරදකි.
“මගේ කැමරාව – මගේ තාප්පය” තර්කය වලංගුද?
බොහෝ අසල්වැසියන් පවසන්නේ තමන්ගේ සල්ලිවලින් තමන්ගේ තාප්පයේ සවි කළ කැමරාව ඕනෑම පැත්තකට හැරවීමට තමන්ට අයිතියක් ඇති බවයි. නමුත් ලංකාවේ නීතියට අනුව කෙනෙකුගේ පෞද්ගලික ජීවිතය නිරීක්ෂණය කිරීමට කිසිවෙකුට අවසර නැත. ආරක්ෂාව සඳහා කැමරා දැමිය යුත්තේ තමන්ගේ දේපළ පෙනෙන සේ මිස, අල්ලපු ගෙදර මිනිසුන් යන එන දිහා බලා සිටීමට (Stalking)නොවේ.
ඔබට ඇති නීතිමය රැකවරණය
ඔබේ පෞද්ගලිකත්වය උල්ලංඝනය වන විට ඔබට ප්රධාන මාවත් දෙකක් ඔස්සේ ක්රියාත්මක විය හැකිය:
1. පෞද්ගලික දත්ත ආරක්ෂණ පනත (PDPA) : පුද්ගලයෙකුගේ රූපය යනු දත්තයකි. ඔබේ අනුදැනුමකින් තොරව සිදුකරන “අසාධාරණ නිරීක්ෂණය” මෙහිදී වරදක් වේ.
2. සිවිල් නීතිය (Actio Iniuriarum):යමෙකු ඔබේ සාමකාමී ජීවිතයට සහ ගෞරවයට හානි කරන්නේ නම්, එයට එරෙහිව වන්දි ඉල්ලීමට හෝ වාරණ නියෝග ලබා ගැනීමට සිවිල් උසාවියට යා හැකිය.
ප්රශ්නය විසඳා ගැනීමට පියවර 3ක්ඔබ මෙවැනි අපහසුතාවයකට මුහුණ දී සිටී නම්, බුද්ධිමත්ව මෙලෙස ක්රියා කරන්න:
1. සුහද සාකච්ඡාව සහ තාක්ෂණික විසඳුම
මුලින්ම අසල්වැසියාට ඔබේ අපහසුව පවසන්න. රණ්ඩු නොවී ඔවුන්ට “Privacy Masking” තාක්ෂණය ගැන කියා දෙන්න. නවීන කැමරාවල සෙටින්ග්ස් හරහා අනවශ්ය කොටස් (ඔබේ නිවස පෙනෙන ප්රදේශය) කළු පැහැති තිරයකින් ආවරණය කිරීමට (Block) හැකියාව ඇත.
2. සමථ මණ්ඩලය
අසල්වැසියා සුහදව එකඟ නොවන්නේ නම්, වහාම ප්රදේශයේ සමථ මණ්ඩලයට පැමිණිල්ලක් ඉදිරිපත් කරන්න. අසල්වැසි ආරවුල් සඳහා ශ්රී ලංකාවේ ප්රථමයෙන් යා යුතු නීතිමය පියවර මෙයයි.
3. පොලිස් සහ නීතිමය පියවර
දිගින් දිගටම සිදුවන හිංසනයක් (Harassment) ලෙස සලකා පොලිසියට පැමිණිලි කරන්න. අවශ්ය නම් නීතිඥයෙකු මාර්ගයෙන් අදාළ කැමරාවේ දිශාව වෙනස් කිරීමට හෝ ඉවත් කිරීමට අධිකරණ නියෝගයක් ලබා ගත හැකිය.
විශේෂ උපදෙස: නීතිමය පියවරක් ගැනීමට පෙර, අදාළ කැමරාව ඔබේ නිවස දෙසට හැරී ඇති ආකාරය දැක්වෙන ඡායාරූප හෝ වීඩියෝ සාක්ෂි (Evidence) එකතු කර තබා ගැනීමට අමතක නොකරන්න.
ඔබේ නිවස තුළ නිදහසේ හුස්ම ගැනීමට ඔබට ඇති අයිතිය කිසිවෙකුට උදුරා ගත නොහැක !
