“ධාවන පථයේ ශ්රී ලංකා සිංහයා” ලෙස විරුදාවලිය ලත් යෙවාන් ඩේවිඩ්, නවසීලන්තයේ පැවැත්වෙන ‘Castrol Toyota Formula Regional Oceania Trophy’ තරගාවලියට එක්වෙමින් සිය 2026 තරග වාරය නිල වශයෙන් ආරම්භ කර තිබේ.
Kiwi Motorsport කණ්ඩායම නියෝජනය කරමින් මෙම තරගාවලියට එක්වන ඔහු, නවසීලන්තයේ පැවැත්වෙන ප්රමුඛතම ‘Open-wheel’ ශූරතාවලියකට සහභාගී වන ප්රථම ශ්රී ලාංකිකයා ලෙසද ඉතිහාසයට එක්විය.
ජනවාරි සහ පෙබරවාරි මුල් සතිය දක්වා වට හතරක් පුරා පැවැත්වෙන මෙම තරගාවලියේ පළමු සති අන්තයේදීම දක්ෂතා දැක්වූ යෙවාන්, සහභාගී වූ සෑම තරගයකදීම මුල් පෙළ ක්රීඩකයින් දස දෙනා අතරට (Top-ten finishes) පැමිණීමට සමත් විය. මෙය 2026 වසරේ ඔහුගේ ඉදිරි ගමන පිළිබඳව තැබූ ඉතා විශ්වාසනීය ආරම්භයකි.
පසුගිය 2025 වසරේ ‘Euroformula Open’ ශූරතාවලියේදී “හොඳම නවක ක්රීඩකයා” (Rookie title) ලෙස කිරුළු පැළඳි යෙවාන්, එහි සමස්ත අනුශූරතාව ද දිනාගත්තේ එවැනි ජයග්රහණයක් ලැබූ පළමු ශ්රී ලාංකිකයා වෙමිනි. මෙම නවසීලන්ත තරගාවලිය ඔහුට ඉතා වැදගත් වන්නේ, මේ වසරේ අගභාගයේදී ඔහු සහභාගී වීමට නියමිත FIA ෆෝමියුලා 3 (F3) ලෝක ශූරතාවලිය සඳහා ලැබෙන හොඳම පෙර පුහුණුවක් ලෙස මෙය සැලකෙන බැවිනි.
ෆෝමියුලා 1 (F1) සිහිනය කරා යන ගමනේදී ෆෝමියුලා 3 නියෝජනය කරන ප්රථම ශ්රී ලාංකිකයා වීමටද යෙවාන් මේ වන විට සූදානමින් සිටියි.
