රජයේ වෛද්ය නිලධාරීන්ගේ සංගමය (GMOA) විසින් ඉල්ලීම් කිහිපයක් මුල් කරගනිමින් අද (23) පෙරවරු 8.00 සිට ආරම්භ කළ පැය 48ක සංකේත වැඩ වර්ජනය හේතුවෙන් දිවයින පුරා රෝහල් රැසක දෛනික කටයුතු අඩපණ වී තිබේ.
සෞඛ්ය අමාත්යවරයා ලබා දුන් එකඟතා ක්රියාත්මක කිරීමට රජය අපොහොසත් වීම මෙම වෘත්තීය ක්රියාමාර්ගයට හේතුව බව වෛද්ය චමිල් විජේසිංහ මහතා සඳහන් කරයි.
විශේෂයෙන්ම බාහිර රෝගී අංශ (OPD) සහ දෛනික සායනික සේවාවන් ක්රියාත්මක නොවීම හේතුවෙන් දුර බැහැර සිට පැමිණි රෝගීන් දැඩි අසීරුතාවයට පත්ව ඇති අතර බොහෝ රෝහල් පාලු ස්වභාවයක් ගන්නා බව වාර්තා වේ.
කෙසේ වෙතත්, රෝගීන්ට සිදුවන පීඩාව අවම කිරීම සඳහා ළමා, මාතෘ, පිළිකා සහ වකුගඩු රෝහල් මෙන්ම ත්රිවිධ හමුදා රෝහල් සහ ජාතික මානසික සෞඛ්ය විද්යායතනය වර්ජනයෙන් නිදහස් කර ඇති අතර හදිසි අනතුරු ඒකක සහ අත්යවශ්ය ප්රතිකාර සේවාවන් අඛණ්ඩව ක්රියාත්මක වේ.
එහෙත් සායන සඳහා පැමිණි බොහෝ රෝගීන් පවසන්නේ වර්ජනය පිළිබඳව තමන් කලින් දැනුවත් නොවූ බැවින් රෝහල් වෙත පැමිණ හිස් අතින් ආපසු හැරී යාමට සිදුවූ බවයි.
