වසර 7ක කාලයක් පාසල්වල ඉගැන්වීම් කටයුතුවල නිරත වූ තමන්ව ගුරු සේවයේ ස්ථීර කරන ලෙස බල කරමින් ගුරු සංවර්ධන නිලධාරීන් පිරිසක් ජනාධිපති ලේකම් කාර්යාලය ඉදිරිපිට ආරම්භ කර ඇති සත්යග්රහය අද (27) උණුසුම් මුහුණුවරක් ගෙන තිබේ.
ඊයේ (26) ඇරඹි මෙම විරෝධතාවයට බලධාරීන්ගෙන් නිසි ප්රතිචාර නොලැබීම හේතුවෙන් එහි සාමාජිකයින් සිව් දෙනෙකු මාරාන්තික උපවාසයක් ආරම්භ කර ඇති අතර, අද පෙරවරුවේ ඔවුන් “යුක්තියේ මළගම” සංකේතවත් කරමින් මිනී පෙට්ටියක් පුළුස්සා විරෝධය දැක්වීමට කටයුතු කළහ.
මෙම අවස්ථාවේදී පොලිසිය මැදිහත් වී පදික වේදිකාව අවහිර වන බව පවසමින් විරෝධතාකරුවන් ඉවත් කිරීමට උත්සාහ කිරීමත් සමඟ දෙපාර්ශ්වය අතර දැඩි විවාදාත්මක තත්ත්වයක් ඇති විය. විරෝධතාකරුවන් චෝදනා කරන්නේ තමන් දීර්ඝ කාලයක් සේවය කළ ද මෙතෙක් ස්ථීර පත්වීම් ලබා දීමට රජය කටයුතු කර නොමැති බවයි.
පවතින උණුසුම් තත්ත්වය හමුවේ එම ප්රදේශයට අතිරේක පොලිස් කණ්ඩායම් කැඳවා ඇති අතර, උපවාසයේ නිරත පිරිසගේ සෞඛ්ය තත්ත්වය පිළිබඳව ද අවධානය යොමු වී තිබේ.
