අස්වැසුම සුබසාධන ප්රතිලාභ ක්රමවේදයේ පළමු සහ දෙවන අදියර යටතේ සුදුසුකම් ලැබූ ප්රතිලාභීන්ගේ ජනවාරි මස දීමනා මෙන්ම වැඩිහිටි දීමනා ද හෙට (28) දිනයේදී ඔවුන්ගේ බැංකු ගිණුම් වෙත බැර කරන බව මුදල්, ක්රම සම්පාදන සහ ආර්ථික සංවර්ධන අමාත්යාංශය නිල වශයෙන් නිවේදනය කර තිබේ.
රජය විසින් මේ සඳහා රුපියල් බිලියන 16කට අධික සමස්ත මුදලක් වෙන් කර ඇති අතර, එමගින් පවුල් ලක්ෂ 16කට අධික සංඛ්යාවකට සහ 680,000කට වැඩි ජ්යෙෂ්ඨ පුරවැසියන් පිරිසකට සෘජු මූල්ය ප්රතිලාභ හිමි වනු ඇත.
පළමු අදියරේ ප්රතිලාභී පවුල් 1,415,584ක් වෙනුවෙන් රුපියල් බිලියන 11.2ක් සහ එහි වැඩිහිටි දීමනා සඳහා රුපියල් බිලියන 3ක මුදලක් බැර කිරීමට නියමිතය.
එසේම දෙවන අදියරේ පවුල් 248,454ක් සඳහා රුපියල් බිලියන 2.2ක් සහ ඊට අදාළ වැඩිහිටි දීමනා සඳහා රුපියල් මිලියන 340ක මුදලක් වෙන් කර තිබේ.
මෙම මුදල් හෙට දිනයේ සිට අදාළ වාණිජ බැංකු ජාල හරහා ලබා ගැනීමට ප්රතිලාභීන්ට අවස්ථාව පවතින බව අමාත්යාංශය වැඩිදුරටත් සඳහන් කරයි.
