දිට්වා සුළි කුණාටුව හේතුවෙන් වසා දමා තිබූ ලෝක උරුම නකල්ස් රිවස්ටන් සංචාරක කලාපය, දැඩි කොන්දේසිවලට යටත්ව දෙස් විදෙස් සංචාරකයන් සඳහා යළි විවෘත කළ බව මාතලේ දිසාපති ප්රසන්න මදනායක මහතා අද (30) නිවේදනය කළේය.
මාතලේ දිස්ත්රික් සම්බන්ධීකරණ කමිටු සභාපති, නියෝජ්ය අමාත්ය ගමගෙදර දිසානායක මහතාගේ ප්රධානත්වයෙන් පැවැති රැස්වීමකදී මෙම තීරණය ගෙන තිබේ.
ඒ අනුව රිවස්ටන් පිවිසුම් මාර්ගය දැනට විවෘතව පවතින්නේ සැහැල්ලු වාහන සඳහා පමණක් වන අතර, ප්රදේශයේ ධාවනය වන මගී ප්රවාහන බස් රථ හැර අනෙකුත් බර වාහන සහ විශාල බස් රථ සඳහා ඇතුළු වීම තවදුරටත් තහනම් කර ඇත.
මාර්ග සංවර්ධන අධිකාරිය, යුද හමුදාව සහ සෙසු රාජ්ය ආයතන එක්ව සිදු කළ කඩිනම් පිළිසකර කිරීම් හේතුවෙන් කෙටි කලක් තුළ මෙම කලාපය යළි සක්රිය කිරීමට හැකි වූ බව දිසාපතිවරයා මෙහිදී පෙන්වා දුන්නේය.
සංචාරකයන්ගේ ආරක්ෂාව සහ පාරිසරික තත්ත්වයන් සලකා බලමින් මෙම සීමාවන් පනවා ඇති අතර, නැවත දැනුම් දෙන තුරු සංචාරකයන් සීමාසහිතව රිවස්ටන් කලාපයට ඇතුළු කර ගැනීමට බලධාරීන් කටයුතු කරනු ඇත.
