දඹුල්ල ඇතුළු දිවයිනේ ප්රධාන තොග වෙළඳ ආර්ථික මධ්යස්ථාන පහක පරිපාලනය රජයෙන් ඉවත් කර ‘නැෂනල් ඇග්රි මාර්කට් සර්විස් ලිමිටඩ්’ (National Agri Market Service Ltd) නමැති පුද්ගලික සමාගමකට පැවරීමට රජය ගෙන ඇති තීරණයට එරෙහිව දඹුල්ල ආර්ථික මධ්යස්ථානයේ වෙළෙඳුන් සිය දැඩි විරෝධය පළ කරති. දශක තුනක කාලයක් රජය යටතේ ක්රියාත්මක වූ මෙම මධ්යස්ථාන කිසිදු නිසි ගිවිසුමකින් තොරව පුද්ගලික අංශයට ලබා දීම තම ව්යාපාරික අයිතීන්ට එල්ල වන බලපෑමක් බව වෙළෙඳසැල් හිමියෝ අවධාරණය කරති.
පසුගිය 31 වැනිදා පස්වරුවේ වෙළෙඳ අමාත්ය වසන්ත සමරසිංහ මහතා සමඟ පැවති සාකච්ඡාවකදී මෙම විරෝධය මතු වූ අතර එහිදී අමාත්යවරයා සහ වෙළෙඳුන් අතර උණුසුම් වාද විවාද ද හටගෙන තිබේ. රජයේ නව සැලසුම අනුව මෙම ආර්ථික මධ්යස්ථාන අධ්යක්ෂවරුන් හත් දෙනෙකුගෙන් සමන්විත කළමනාකරණ භාරයක් යටතට පත් කිරීමට නියමිතය. කෙසේ වෙතත්, මෙම පෞද්ගලීකරණය හරහා ගොවීන්ට සහ වෙළෙඳුන්ට අසාධාරණයක් සිදුවන බව පවසන වෙළෙඳ සංගම් නියෝජිතයන් පෙන්වා දෙන්නේ මෙම තීරණය වහාම හකුලා ගත යුතු බවයි.
