පෙබරවාරි 05 – ශ්රී ලංකාවේ රජයේ පාසල් පද්ධතිය තුළ පවතින දැඩි ගුරු හිඟය පිළිබඳව ජනලේඛන හා සංඛ්යාලේඛන දෙපාර්තමේන්තුව විසින් සිදුකළ නවතම සංගණනයකින් තැතිගන්වනසුලු තොරතුරු රැසක් අනාවරණය වී තිබේ. 2025 වසරේ දත්තවලට අනුව දිවයින පුරා පවතින රජයේ පාසල් 10,047ක් අතරින් පාසල් 3,065කම සේවය කරනු ලබන්නේ ගුරුවරුන් 10 දෙනෙකුට වඩා අඩු පිරිසකි. වඩාත්ම පුදුමයට කරුණ වන්නේ එලෙස ගුරුවරුන් 10ට අඩු පාසල් අතර එක් ජාතික පාසලක් ද ඇතුළත් වීමයි.
එමෙන්ම පාසල්වල ශිෂ්ය සංඛ්යාව ද කැපී පෙනෙන ලෙස පහත වැටී ඇති බව වාර්තා වේ. රජයේ පාසල් 1,645ක ශිෂ්ය සංඛ්යාව 50ට වඩා අඩු මට්ටමක පවතින අතර, තවත් පාසල් 1,648ක ශිෂ්ය පිරිස 51ත් 100ත් අතර වේ. මීට අමතරව 2024 වසරට සාපේක්ෂව 2025 වසරේදී පළමුවන ශ්රේණියට ඇතුළත් වූ දරුවන්ගේ සංඛ්යාව ද පහත වැටී ඇති අතර, ජනලේඛන හා සංඛ්යාලේඛන දෙපාර්තමේන්තුව පෙන්වා දෙන්නේ 2025 වසරේදී පළමු ශ්රේණියට ඇතුළත් වී ඇත්තේ සිසුන් 266,281ක් පමණක් බවයි. ග්රාමීය මෙන්ම නාගරික ප්රදේශවල ද පාසල් පද්ධතිය මුහුණ දී ඇති මෙම සම්පත් හා ශිෂ්ය ඌනතාව අධ්යාපන ක්ෂේත්රයේ දැඩි කතාබහට ලක්ව තිබේ.
