සිරගතව සිටින පකිස්ථාන හිටපු අග්රාමාත්ය ඉම්රාන් ඛාන් හමුවීම සඳහා ඔහුගේ පුතුන් වන කාසිම් සහ සුලෙයිමාන් ඉදිරිපත් කළ වීසා අයදුම්පත් පකිස්ථාන බලධාරීන් විසින් ප්රතික්ෂේප කර ඇති බව විදෙස් මාධ්ය වාර්තා කරයි. තම පියා වසර දෙකකට වැඩි කාලයක් තිස්සේ හුදකලා සිරකඳවුරක රඳවා සිටින අතර, ඔහුගේ සෞඛ්ය තත්ත්වය පිළිබඳව පවතින දැඩි අවිනිශ්චිතතාව හමුවේ පවුලේ සාමාජිකයන්ට ඔහුව බැලීමට අවසර නොදීම මානව හිමිකම් උල්ලංඝනය කිරීමක් බව කාසිම් ඛාන් පෙන්වා දෙයි.
මෙම සිද්ධිය සම්බන්ධයෙන් අදහස් දක්වන පකිස්ථාන අධිකරණ ආරංචි මාර්ග සඳහන් කරන්නේ, අධිකරණ නියෝග පවතිද්දී පවා බන්ධනාගාර බලධාරීන් විවිධ තාක්ෂණික හේතු ඉදිරිපත් කරමින් මෙම හමුවීම් වළක්වන බවයි. මේ හේතුවෙන් පකිස්ථාන රජය සිය දේශපාලන පළිගැනීම් සඳහා පවුල් සබඳතාවලට පවා බාධා පමුණුවන බවට ලොව පුරා විසිරී සිටින PTI පාක්ෂිකයන් අතර දැඩි විරෝධයක් මතුව තිබේ. ඉම්රාන් ඛාන්ගේ වෛද්ය වාර්තා ප්රසිද්ධ කරන ලෙසත්, ඔහුට අවශ්ය ස්වාධීන වෛද්ය පරීක්ෂණ සඳහා ඉඩ ලබා දෙන ලෙසත් ජාත්යන්තර ක්ෂමා සංවිධානය ද පකිස්ථාන රජයෙන් ඉල්ලා ඇත.
