අම්පාර දිස්ත්රික්කයේ පොතුවිල් ආරුගම්බේ වෙරළ තීරයට මායිම්ව පිහිටි හෙක්ටයාර 18ක ‘හොරක්ගොඩ’ වනාන්තර පද්ධතියට එල්ල වී ඇති තර්ජන හේතුවෙන් ප්රදේශයේ සංචාරක කර්මාන්තය, විශේෂයෙන්ම ‘සර්ෆිං’ (Surfing) ක්රීඩාව දැඩි අවදානමකට ලක්ව ඇති බව වාර්තා වේ. ආරුගම්බේ මුහුදේ පවතින සුවිශේෂී උස් රළ ස්වභාවය පවත්වා ගැනීමට මෙම ස්වභාවික වැලි වැටිය සහ වනාන්තරය සෘජුවම දායක වන බව පරිසරවේදීන් සහ ප්රදේශවාසීන් පෙන්වා දෙති.
මෙම සංවේදී පරිසර පද්ධතිය රක්ෂිතයක් ලෙස ගැසට් කිරීම සඳහා වන සංරක්ෂණ දෙපාර්තමේන්තුව 2023 වසරේදී කටයුතු සම්පාදනය කළද, ප්රදේශයේ දේශපාලන බලපෑම් සහ ව්යාජ ඉඩම් බලපත්ර ජාවාරම් හේතුවෙන් එම ක්රියාවලිය ඇණහිට ඇති බව පැවසේ. හිටපු විෂය භාර ඇමතිවරුන් ඊට අත්සන් තැබීමට මැලිවීම සහ වර්තමාන නියෝජ්ය අමාත්ය වසන්ත පියතිස්ස මහතා විසින් ඉන් හෙක්ටයාර 02ක කොටසක් පුද්ගලයෙකුට නිදහස් කිරීමට උත්සාහ කිරීම පිළිබඳව පරිසර යුක්ති කේන්ද්රය ඇතුළු සංවිධාන සිය විරෝධය පළ කර ඇත.
කැස්බෑවන් බිත්තර දැමීම සඳහා පැමිණෙන සහ පලු, වීර වැනි දුර්ලභ ශාකවලින් සමන්විත මෙම හොරක්ගොඩ වනාන්තරය විනාශ වුවහොත් සුළං රටාවන් වෙනස් වී ආරුගම්බේ වෙරළේ සර්ෆිං ක්රීඩාවට ඇති ජාත්යන්තර ආකර්ෂණය අහිමි වනු ඇතැයි සමුද්රීය ආරක්ෂණ නිලධාරීහු අනතුරු අඟවති. දැනට ඉදිරිපත් වී ඇති අයිතිවාසිකම් ඉල්ලීම් 10කින් 09ක්ම ව්යාජ බලපත්ර බව අධිකරණයේදී තහවුරු වී ඇති පසුබිමක, මෙම භූමිය වහාම රක්ෂිතයක් ලෙස ප්රකාශයට පත් කළ යුතු බව පරිසරවේදීන්ගේ දැඩි ඉල්ලීමයි.
