ජනතා විමුක්ති පෙරමුණේ (JVP/NPP) ප්රධාන ලේකම් ටිල්වින් සිල්වා මහතා සහ ඉන්දීය විදේශ කටයුතු අමාත්ය ආචාර්ය එස්. ජයිශංකර් මහතා අතර දිල්ලියේදී පැවැති හමුව පිළිබඳව අදහස් දක්වමින්, විපක්ෂයේ පාර්ලිමේන්තු මන්ත්රී හර්ෂ ද සිල්වා මහතා රජයේ විදේශ හා ආර්ථික ප්රතිපත්තිය දැඩි ලෙස විවේචනය කළේය.
දශක ගණනාවක් පුරා ඉන්දියාව සමඟ සමීප ආර්ථික සබඳතා ගොඩනගා ගැනීමට තිබූ අවස්ථා මඟහැරීම හරහා තරුණ ජීවිත දහස් ගණනක් සහ වටිනා කාලය අපතේ ගිය බව ඔහු පෙන්වා දුන්නේය. ලොව වේගයෙන්ම වර්ධනය වන ආර්ථිකය හිමි ඉන්දියාව සමඟ සමීප ඒකාබද්ධතාවයක වැදගත්කම දේශපාලන නායකයින් තේරුම් ගත යුතු බව ඔහු ‘X’ පණිවුඩයක් නිකුත් කරමින් සඳහන් කළේය.
යෝජිත ආර්ථික හා තාක්ෂණික සහයෝගිතා ගිවිසුම (ETCA) සම්බන්ධයෙන් රජය දක්වන මන්දගාමී ප්රතිපත්තිය මෙහිදී මන්ත්රීවරයාගේ විශේෂ විවේචනයට ලක් විය. පසුගිය වසර එකහමාරක කාලය තුළ ඒ සම්බන්ධයෙන් කිසිදු ප්රගතියක් නොමැති බවත්, ජනාධිපතිවරයාගේ හෝ අගමැතිවරයාගේ නිල සංචාරයන්හිදී පවා ඒ පිළිබඳව සඳහන් නොවන බවත් ඔහු පැවසීය.
අවස්ථාවාදී ජාතිකවාදීන් තමන්ට ප්රහාර එල්ල කරනු ඇතැයි තමන් දන්නා බවත්, අතීතයේ ‘1990 සුවසැරිය’ ගිලන්රථ සේවාව ආරම්භ කරන විටත් තමන් මෙවැනිම ප්රහාරයන්ට ලක්වූ බවත් හර්ෂ ද සිල්වා මහතා සිහිපත් කළේය. එදා තමන් පසුබට වූයේ නම් අද සුවසැරියක් නොමැති බව පෙන්වා දුන් ඔහු, රටේ අනාගතය වෙනුවෙන් නිර්භීත තීන්දු ගත යුතු බව වැඩිදුරටත් අවධාරණය කළේය.
