ශ්රී ලංකාව තුළ දෛනිකව නව පිළිකා රෝගීන් 100ක් පමණ වාර්තා වන බව සෞඛ්ය නියෝජ්ය අමාත්ය වෛද්ය හංසක විජේමුණි මහතා පවසයි. කොළඹ ජාතික රෝහලේ බාහිර රෝගී අංශ පරිශ්රයේ අලුතින් ස්ථාපිත කළ ‘පිළිකා කලින් හඳුනාගැනීමේ මධ්යස්ථානය’ විවෘත කිරීමේ අවස්ථාවට එක්වෙමින් ඔහු පෙන්වා දුන්නේ දිනකට පිළිකා රෝගීන් 40 දෙනෙකු පමණ මිය යන ඛේදනීය තත්ත්වයක් ද පවතින බවයි. බොහෝ රෝගීන් ප්රතිකාර සඳහා යොමුවන්නේ රෝගයේ පසුකාලීන අවධීන්වලදී වීම මරණ සංඛ්යාව ඉහළ යාමට ප්රධාන හේතුවක් බව අමාත්යවරයා මෙහිදී අවධාරණය කළේය.
ජාතික පිළිකා මර්දන වැඩසටහනේ දත්තවලට අනුව මෙරට කාන්තාවන් අතර පියයුරු පිළිකා වැළඳීමේ ප්රවණතාව ඉහළ ගොස් ඇති අතර, දිනකට කාන්තාවන් 15 දෙනෙකු පියයුරු පිළිකාවට ගොදුරු වන බවත් ඉන් තිදෙනෙකු මිය යන බවත් හෙළි වී තිබේ. මේ හේතුවෙන් වයස අවුරුදු 20 ඉක්මවූ සෑම කාන්තාවක්ම මසකට වරක් ස්වයං පියයුරු පරීක්ෂාවක නිරත විය යුතු බවත්, වයස අනුව වසරකට හෝ වසර තුනකට වරක් වෛද්ය සායනයක් මගින් පරීක්ෂා කරවා ගැනීම අත්යවශ්ය බවත් සෞඛ්ය අංශ උපදෙස් දෙයි. දැනට දිවයිනේ ප්රධාන රෝහල් 6ක ක්රියාත්මක වන මෙම පිළිකා කලින් හඳුනාගැනීමේ මධ්යස්ථාන ඉදිරියේදී සෑම දිස්ත්රික්කයකම ස්ථාපිත කිරීමට රජය සැලසුම් කර ඇත.
