ශ්රී ලංකා විදුලි සංදේශ පනතේ විධිවිධාන ප්රකාරව, 2019 අගෝස්තු 02 දිනට පෙර ලබාගත් සිම් (SIM) කාඩ්පත් නැවත ලියාපදිංචි කිරීම සඳහා නව රෙගුලාසි හඳුන්වා දීමට අමාත්ය මණ්ඩල අනුමැතිය හිමිව තිබේ. දැනට පවතින රෙගුලාසි අදාළ වන්නේ 2019 අගෝස්තු 02 දිනෙන් පසුව නිකුත් කළ සිම් කාඩ්පත් සඳහා පමණක් වන බැවින්, ඊට පෙර ලියාපදිංචි වූ ඇතැම් ග්රාහකයින්ගේ තොරතුරු දුරකථන සමාගම් සතුව නොමැති වීම විමර්ශන කටයුතුවලට බාධාවක් වී ඇති බව රජය පෙන්වා දෙයි.
ඩිජිටල් ආර්ථික අමාත්යවරයා ලෙස ජනාධිපතිවරයා ඉදිරිපත් කළ මෙම යෝජනාවට අනුව, වයස අවුරුදු 16-17 අතර ග්රාහකයින් ලියාපදිංචි කිරීම සහ විදේශිකයින්ට සිම් කාඩ්පත් නිකුත් කිරීම සඳහා ද නව විධිවිධාන ඇතුළත් කරමින් වර්තමාන අවශ්යතාවන්ට ගැළපෙන පරිදි රෙගුලාසි සංශෝධනය කෙරෙනු ඇත. ඒ අනුව පරණ සිම් කාඩ්පත් හිමියන් හට සිය තොරතුරු යාවත්කාලීන කරමින් නැවත ලියාපදිංචි වීමට ඉදිරියේදී අවස්ථාව සලසා දීමට නියමිතය.
