ඩොනල්ඩ් ට්රම්ප්ගේ දෙවන ධුර කාලය සම්බන්ධයෙන් තම පියා සමඟ ඇති වූ උණුසුම් වාදයකින් අනතුරුව, ටෙක්සාස්හිදී වෙඩි ප්රහාරයකට ලක්ව මියගිය බ්රිතාන්ය ජාතික තරුණියක වන ලුසී හැරිසන්ගේ මරණය පිළිබඳ පරීක්ෂණයේදී සංවේදී තොරතුරු රැසක් අනාවරණය වී තිබේ. 23 හැවිරිදි ලුසී, 2025 ජනවාරි 10 වන දින ඇමරිකාවේ ප්රොස්පර්හි පිහිටි සිය පියාගේ නිවසේදී පපුවට වෙඩි වැදීමෙන් ජීවිතක්ෂයට පත්ව ඇත. බ්රිතාන්යයේ චෙෂයර් හදිසි මරණ පරීක්ෂක අධිකරණයේදී පැවති විභාගයේදී හෙළි වූයේ, වෙඩි තැබීමට පෙර ට්රම්ප්ගේ දේශපාලනය සහ ලිංගික අපයෝජන චෝදනා සම්බන්ධයෙන් පියා සහ දියණිය අතර දරුණු වාදයක් පැවති බවයි.
ලුසීගේ පෙම්වතා වන සෑම් ලිට්ලර් සාක්ෂි දෙමින් කියා සිටියේ, ට්රම්ප්ට එල්ල වී ඇති අපයෝජන චෝදනා ගැන ඇසූ ප්රශ්නයකට පියා දුන් පිළිතුර නිසා ලුසී දැඩි ලෙස කලබල වූ බවයි. ඇය නිවසින් පිටව ගුවන් තොටුපළට යාමට සුදානම්ව සිටියදී, ඇගේ පියා වන ක්රිස් හැරිසන් ඇයව නිදන කාමරයට කැඳවා ඔහුගේ ග්ලොක් 9mm වර්ගයේ ගිනි අවිය පෙන්වීමට උත්සාහ කර ඇති අතර එහිදී වෙඩි වැදීම සිදුව ඇත. අනතුර සිදුවන අවස්ථාවේ පියා මත්පැන් පානය කර සිට ඇති බවත්, මරණ පරීක්ෂණය සඳහා ඔහු සහභාගී නොවූ බවත් වාර්තා වේ. ටෙක්සාස් පොලිසිය මෙය මනුෂ්ය ඝාතනයක් ලෙස මුලින් පරීක්ෂණ පැවැත්වුවද, ඇමරිකානු ජූරි සභාව ඔහුට එරෙහිව අපරාධ චෝදනා ගොනු කිරීම ප්රතික්ෂේප කර තිබේ.
