බුද්ධ ශාසනය සහ මහා සංඝරත්නය වෙනුවෙන් පෙනී සිටීම ජාතිවාදය නොවන බවත්, තමන් සිංහල බෞද්ධයෙකු ලෙස අනෙකුත් ආගම් හා සංස්කෘතීන් ද ආරක්ෂා කිරීමට කැපවන බවත් ශ්රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්රී නාමල් රාජපක්ෂ මහතා පවසයි. නෙළුම් මාවතේ පිහිටි පක්ෂ කාර්යාලයේදී අද (11) පැවති මාධ්ය හමුවකදී ඔහු අවධාරණය කළේ රට ගොඩනැගී ඇත්තේ බෞද්ධ පදනම මත වුවද, එම පදනම තුළ සියලු ආගම් ආරක්ෂා කිරීමේ හැකියාව පවතින බවයි. තමන්ගේ දහම සහ සංස්කෘතිය පිළිබඳ විශ්වාසයක් නොමැති පුද්ගලයෙකුට වෙනත් අයෙකුගේ සංස්කෘතියක් ආරක්ෂා කළ නොහැකි බවත්, තමන් බෞද්ධ අනන්යතාවය රැකගනිමින් සියලු ජාතීන්ගේ අයිතිවාසිකම් වෙනුවෙන් පෙනී සිටින බවත් ඔහු මෙහිදී ප්රකාශ කළේය.
ආණ්ඩුවේ ක්රියාකලාපය විවේචනය කරමින් මන්ත්රීවරයා සඳහන් කළේ මැතිවරණයක් පවත්වනවාද නැතහොත් තමන්ව සිරගත කරනවාද යන්න පිළිබඳව ආණ්ඩුව දෙගඩියාවෙන් පසුවන බවයි. රටේ වත්මන් දේශපාලන තත්ත්වය තුළ නායකයන්ගේ හිඟයක් පවතින බව පෙන්වා දුන් ඔහු, අවසානයේ වෙනත් පාර්ශව විසින් මෙහෙයවන “රූකඩ නායකයන්” බිහිවීමේ අවදානමක් පවතින බවට ද අනතුරු ඇඟවීය. එම නිසා සියලු දේශපාලන පක්ෂවල සිටින නායකයන් ඉදිරි නායකත්වය සඳහා සූදානම් විය යුතු බවත්, ජනතාව විසින් සුදුසුම පුද්ගලයා තෝරාගනු ඇති බවත් නාමල් රාජපක්ෂ මහතා වැඩිදුරටත් කියා සිටියේය.
