අනිද්දා (පෙබරවාරි 15) කොළඹ ආර්. ප්රේමදාස ක්රීඩාංගණයේදී පැවැත්වෙන ඉන්දියාව සහ පාකිස්ථානය අතර විස්සයි-20 ලෝක කුසලාන තරඟය නැරඹීමට පැමිණෙන ප්රේක්ෂකයන් වෙනුවෙන් ශ්රී ලංකා පොලිසිය විශේෂ ආරක්ෂක සහ රථවාහන සැලැස්මක් ප්රකාශයට පත් කර ඇත. පොලිස් මාධ්ය ප්රකාශක සහකාර පොලිස් අධිකාරී එෆ්. යූ. වුට්ලර් මහතා පවසන්නේ එදිනට දැඩි ප්රේක්ෂක තදබදයක් අපේක්ෂා කරන බවයි.
පොලිසිය දැනුම් දුන් ප්රධාන උපදෙස් සහ රථවාහන සැලැස්ම මෙසේය:
ගමනාගමනය සීමා කෙරෙන මාර්ග: වින්ඩ්සන් පෙරේරා මාවත, බ්රිටෝ බබාපුල්ලේ පාලම සහ බාපුල්ලේ පාලම අසලින් ක්රීඩාංගණය දෙසට ඇතුළු වන මාර්ග, මල්වත්ත හන්දිය, අඩි 100 පාර (පන්සල් පාර හන්දිය), මාලිගාවත්ත පටු මඟ සහ සද්ධර්ම මාවත යන ප්රදේශවල ගමනාගමනය සීමා කෙරේ. ආරක්ෂක පියවර: ක්රීඩාංගණයට ඇතුළු වන සෑම පුද්ගලයෙකුම විශේෂ ශරීර පරීක්ෂාවකට ලක් කෙරෙන අතර, සෑම ඇතුළුවීමේ දොරටුවක්ම CCTV කැමරා පද්ධති හරහා නිරන්තර අධීක්ෂණයට ලක් කිරීමට කටයුතු යොදා ඇත. දොරටු විවෘත කිරීම: තරඟය පස්වරු 7.00 ට ආරම්භ වුවද, පස්වරු 3.00 සිට ක්රීඩාංගණයේ දොරටු ප්රේක්ෂකයන් වෙනුවෙන් විවෘතව තැබේ. පරීක්ෂා කිරීම් සඳහා ගතවන කාලය සැලකිල්ලට ගෙන හැකි ඉක්මනින් ක්රීඩාංගණය වෙත පැමිණෙන ලෙස පොලිසිය ඉල්ලා සිටියි. විකල්ප මාර්ග: කොළඹ හරහා ගමන් ගන්නා රියදුරන්ට පවතින රථවාහන තදබදය මඟහැරීම සඳහා විකල්ප මාර්ග භාවිත කරන ලෙස ද පොලිසිය දැනුම් දී සිටියි.
