2026 විස්සයි20 ලෝක කුසලාන ක්රිකට් තරගාවලියේ අද (13) චෙන්නායිහි එම්. ඒ. චිදම්බරම් ක්රීඩාංගණයේදී පැවැති තීරණාත්මක තරගයකින් නෙදර්ලන්තය ලකුණු 93කින් පරාජය කරමින් අමතක නොවන ජයග්රහණයක් වාර්තා කිරීමට අමෙරිකානු කණ්ඩායම සමත් විය. මෙම ජයග්රහණයත් සමඟ අමෙරිකාව සිය සුපිරි 08 දෙනාගේ වටයට සුදුසුකම් ලැබීමේ බලාපොරොත්තු තවදුරටත් ජීවමාන කරගත් අතර එය ඔවුන් විස්සයි20 ජාත්යන්තර තරගයකදී නෙදර්ලන්තයට එරෙහිව ලැබූ පළමු ජයග්රහණය ලෙස ද ඉතිහාසයට එක්විය.
කාසියේ වාසිය දිනූ නෙදර්ලන්ත කණ්ඩායමේ ආරාධනයෙන් පළමුව පන්දුවට පහරදුන් අමෙරිකානු කණ්ඩායම නියමිත පන්දුවාර 20 අවසානයේ කඩුලු 6ක් දැවී ලකුණු 196ක දැවැන්ත ලකුණු සංඛ්යාවක් රැස් කළේය. අමෙරිකානු ඉනිම ශක්තිමත් කළ සයිතේජා මුක්කමල්ලා පන්දු 51කදී ලකුණු 79ක් රැස් කළ අතර, ශුභම් රන්ජානි පන්දු 24කදී නොදැවී ලකුණු 48ක් සහ නායක මොනෑන්ක් පටෙල් ලකුණු 36ක් ලබා ගනිමින් ඉනිමට වටිනා දායකත්වයක් ලබා දුන්හ. පන්දු යැවීමේදී නෙදර්ලන්තය වෙනුවෙන් බාස් ද ලීඩ් ලකුණු 37කට කඩුලු 3ක් දවා ගැනීමට සමත් විය.
ලකුණු 197ක ජයග්රාහී ඉලක්කයක් හඹා යාමට පිටියට පිවිසි නෙදර්ලන්ත කණ්ඩායමට අමෙරිකානු පන්දු යවන්නන් හමුවේ කිසිදු අවස්ථාවක් හිමි නොවූ අතර ඔවුන් පන්දුවාර 15යි පන්දු 5ක් තුළ ලකුණු 103කට සියලු දෙනා දැවී ගියහ. නෙදර්ලන්ත ඉනිමේ වැඩිම ලකුණු ලාභියා වූ බාස් ද ලීඩ් ලකුණු 23ක් රැස් කළේය. අති විශිෂ්ට පන්දු යැවීමක නිරත වූ හර්මීට් සිං ලකුණු 21කට කඩුලු 4ක් දවා ගනිමින් තරගයේ වීරයා සම්මානය දිනාගත් අතර, නෝස්තුෂ් කෙන්ජිගේ සහ ශැඩ්ලි වැන් ෂල්ක්වික් ද දක්ෂ පන්දු යැවීමක නිරත වෙමින් අමෙරිකානු ජයග්රහණය තහවුරු කළහ.
