කෘත්රිම බුද්ධිය මානව වර්ගයාගේ යහපත උදෙසා වගකීම් සහගතව භාවිත කිරීමේ අරමුණින්, ඉන්දීය අග්රාමාත්ය නරේන්ද්ර මෝදි මහතාගේ ප්රධානත්වයෙන් පැවැත්වෙන විශේෂ ඒ.අයි. (AI) සමුළුව හෙට (16) නවදිල්ලි නුවරදී ආරම්භ වේ. දින පහක් පුරා පැවැත්වෙන මෙම සමුළුව සඳහා රටවල් 20ක රාජ්ය නායකයන් සහ රටවල් 45කට අධික සංඛ්යාවක දූත පිරිස් සහභාගී වීමට නියමිත අතර, ශ්රී ලංකා ජනාධිපති අනුර කුමාර දිසානායක මහතා ද මීට එක්වීම විශේෂත්වයකි.
ප්රංශ ජනාධිපති ඉමැනුවෙල් මැක්රොන්, බ්රසීල ජනාධිපති ලූලා ද සිල්වා සහ එක්සත් ජාතීන්ගේ මහලේකම්වරයා ඇතුළු ලෝක නායකයන් රැසකගේ සහභාගීත්වයෙන් පැවැත්වෙන මෙම සමුළුවේදී කෘත්රිම බුද්ධි තාක්ෂණයේ අනාගත ගමන්මග සහ ගෝලීය අභියෝග ජයගැනීමට එය භාවිත කළ හැකි ආකාරය පිළිබඳ දීර්ඝ වශයෙන් සාකච්ඡා කිරීමට නියමිතය. කෘත්රිම බුද්ධිය සම්බන්ධයෙන් ඉන්දියාව අනුගමනය කරන මානුෂීය සහ තිරසාර ප්රවේශය ලොවට විදහා දැක්වීම මෙම සමුළුවේ ප්රධාන අරමුණක් බව ඉන්දීය මාධ්ය වාර්තා පෙන්වා දෙයි.
