හිටපු ජනාධිපති රනිල් වික්රමසිංහ මහතා එක්සත් රාජධානියේ සිදුකළ සංචාරය පිළිබඳව තොරතුරු ඉල්ලා අපරාධ පරීක්ෂණ දෙපාර්තමේන්තුව (CID) යොමුකළ ලිපියට වුල්වර්හැම්ප්ටන් විශ්වවිද්යාලය මෙතෙක් ප්රතිචාර දක්වා නොමැති බව වාර්තා වේ. පෙබරවාරි 4 වැනිදා විද්යුත් තැපෑල සහ ගුවන් තැපෑල මගින් අදාළ විශ්වවිද්යාල ලේකම්වරිය සහ සහකාර විධායක නිලධාරියෙකු වෙත මෙම ප්රශ්නාවලිය යොමුකර තිබුණි. හිටපු ජනාධිපතිවරයාට සිය බිරිඳගේ උපාධි ප්රදානෝත්සවයට සහභාගී වන ලෙස ලැබුණු ආරාධනය නිල මට්ටමේ එකක්ද නැතහොත් පෞද්ගලික ආරාධනයක්ද යන්න තහවුරු කරගැනීම මෙම විමර්ශනයේ මූලික අරමුණ වී ඇත.
මෙම සංචාරයේදී රුපියල් මිලියන 16.6ක රාජ්ය අරමුදල් අවභාවිත කළ බවට එල්ල වී ඇති චෝදනාව මත හිටපු ජනාධිපති ලේකම් සමන් ඒකනායක මහතා පෙබරවාරි 18 වැනිදා දක්වා නැවත රක්ෂිත බන්ධනාගාර ගත කර තිබේ. අධිකරණයේදී කරුණු දක්වමින් ඒකනායක මහතාගේ නීතිඥ කාලිංග ඉන්දතිස්ස මහතා ප්රකාශ කළේ අදාළ වියදම් ඇස්තමේන්තු එවක බ්රිතාන්යයේ ශ්රී ලංකා මහ කොමසාරිස් සරෝජා සිරිසේන මහත්මිය විසින් සකස් කර විදේශ කටයුතු අමාත්යාංශය වෙත යොමු කර ඇති බවයි. එහි යම් ගැටලුවක් තිබුණේ නම් එය ප්රතික්ෂේප කිරීමට අමාත්යාංශයට හැකියාව තිබූ බවද ඔහු පෙන්වා දුන්නේය.
අතිරේක සොලිසිටර් ජනරාල් දිලීප පීරිස් මහතා කොටුව මහේස්ත්රාත් අධිකරණයට දැනුම් දුන්නේ විශ්වවිද්යාලය වෙත ප්රශ්න 9ක් යොමුකර ඇති නමුත් මෙතෙක් ඒවාට පිළිතුරු ලැබී නොමැති බවයි. මෙම නඩුව ලබන පෙබරවාරි 18 වැනිදා නැවත කැඳවීමට නියමිතය.
