තලංගම, අකුරේගොඩ ප්රදේශයේදී නීතිඥ බුද්ධික මල්ලවආරච්චි මහතා සහ ඔහුගේ බිරිඳ වෙඩි තබා ඝාතනය කිරීමේ පුවත හෙළා දකිමින් විපක්ෂ නායක සජිත් ප්රේමදාස මහතා විශේෂ නිවේදනයක් නිකුත් කර තිබේ. රට තුළ හදිසි නීතිය ක්රියාත්මක වෙමින්, ත්රිවිධ හමුදාව පවා ආරක්ෂාවට යොදවා ඇති මොහොතක, හමුදා මූලස්ථානය ආසන්නයේ පිහිටි මෙවැනි අධි ආරක්ෂිත කලාපයක පවා “චිකාගෝ ක්රමයට” මනුෂ්ය ඝාතන සිදුවීම පිළිබඳව රජය වහාම රටට පැහැදිලි කිරීමක් කළ යුතු බව ඔහු අවධාරණය කරයි.
රජය බලයට පැමිණීමේදී නීතිය හා සාමය සුරක්ෂිත කිරීම පිළිබඳව කළ ප්රකාශ හුදෙක් වේදිකාවලට පමණක් සීමා වී ඇති බව පෙන්වා දෙන විපක්ෂ නායකවරයා, වත්මන් පාලනය යටතේ නීතියේ ආධිපත්යය බිඳ වැටී ඇති බව පවසයි. පාතාලය මර්දනය කරන බව කියමින් සෑම ඝාතනයක්ම මත්ද්රව්ය ජාවාරම්කරුවන් මත පටවා රජය තම වගකීමෙන් මිදීමට දරන උත්සාහය ද ඔහු සිය නිවේදනය මගින් දැඩි ලෙස විවේචනය කර තිබේ. මෙම ඝාතනය සම්බන්ධයෙන් විධිමත් පරීක්ෂණයක් පවත්වා වගකිව යුත්තන් වහාම නීතිය හමුවට පමුණුවන ලෙස ද ඔහු ඉල්ලා සිටියි.
නීතිඥවරයා සහ ඔහුගේ බිරිඳ ඝාතනය කිරීමට වෙඩික්කරුවන් පැමිණි බවට සැක කෙරෙන මෝටර් රථය අද (15) පෙරවරුවේ ගාල්ල, අගලිය ප්රදේශයේ අතුරු මාර්ගයක දමා ගොස් ගිනි තබා තිබියදී පොලිසිය විසින් සොයාගෙන තිබේ. මෙම ඝාතනය විදේශගතව සිටින සංවිධානාත්මක අපරාධකරුවෙකු වන ‘කරන්දෙණිය සුද්දා’ විසින් මෙහෙයවා ඇති බවට පොලිසිය සැක පළ කරයි. ඒ සඳහා ටී-56 ගිනි අවි සහ මිලිමීටර 9 වර්ගයේ පිස්තෝල භාවිතා කර ඇති අතර, සැකකරුවන් අත්අඩංගුවට ගැනීමට විශේෂ පොලිස් කණ්ඩායම් 10 ක් යොදවා ඇත.
