මෙවර ආදරවන්තයන්ගේ දිනයේදී චොකලට් ලෝලීන්ට සිය ප්රියතම රසකැවිලි සඳහා වෙනදාට වඩා වැඩි මුදලක් වැය කිරීමට සිදුව ඇති බව වාර්තා වේ. Datasembly වෙළඳපල පර්යේෂණ ආයතනයට අනුව, පසුගිය වසරට සාපේක්ෂව චොකලට් මිල 14.4% කින් ඉහළ ගොස් ඇත. මෙය 2024 වසරේ වාර්තා වූ 10.5% ක මිල ඉහළ යාමට වඩා කැපී පෙනෙන වර්ධනයකි. ඇමරිකා එක්සත් ජනපදය පුරා වෙළඳසැල් 57,000 ක නිෂ්පාදන 4,000 කට අධික ප්රමාණයක් නිරීක්ෂණය කිරීමෙන් මෙම දත්ත අනාවරණය වී තිබේ.
මෙම මිල ඉහළ යාමට ප්රධානතම හේතුව වී ඇත්තේ චොකලට් නිෂ්පාදනයට ගන්නා ප්රධාන අමුද්රව්යය වන කොකෝවා බෝංචි සඳහා ලෝක වෙළඳපල තුළ පවතින දැඩි හිඟයයි. ලොව කොකෝවා නිෂ්පාදනයෙන් 70% ක්ම සිදුකරන බටහිර අප්රිකානු කලාපයට බලපෑ අයහපත් කාලගුණය හේතුවෙන් අස්වැන්න විශාල ලෙස පාලනය විය. මෙහි ප්රතිඵලයක් ලෙස 2022 වසරේදී මෙට්රික් ටොන් එකක් ඩොලර් 2,500 ක් වූ කොකෝවා මිල, 2024 අගභාගය වන විට ඩොලර් 12,600 ක් වැනි අදහාගත නොහැකි මට්ටමකට ඉහළ ගියේය.
දැනට ලෝක වෙළඳපලේ කොකෝවා මිල යළිත් ඩොලර් 4,000 සීමාවට පහත වැටී තිබුණද, පාරිභෝගිකයන්ට එහි සහනය ලැබීමට තව මාස කිහිපයක් ගතවනු ඇත. චොකලට් නිෂ්පාදකයන් කොකෝවා බෝංචි මාස කිහිපයකට පෙර සිටම ඇණවුම් කර තබා ගන්නා බැවින්, දැනට වෙළඳපල සතු නිෂ්පාදන ඉහළ මිලට ගත් කොකෝවා යොදාගෙන නිපදවූ ඒවා වීම ඊට හේතුවයි. කෙසේ වෙතත්, පාස්කු උත්සවය වන විට මෙම මිල ගණන් තරමක් ස්ථාවර වනු ඇති බවත්, ලබන නොවැම්බර් මාසයේ හැලොවීන් (Halloween) සමය වන විට මිල ගණන් පහත වැටෙනු ඇති බවත් ආර්ථික විශේෂඥයෝ පවසති.
