සාම මණ්ඩලයේ (Board of Peace) සාමාජික රටවල් ගාසා තීරයේ ප්රතිසංස්කරණ සහ මානුෂීය කටයුතු වෙනුවෙන් ඇමරිකානු ඩොලර් බිලියන 5කට අධික මුදලක් ලබාදීමට පොරොන්දු වී ඇති බව අමෙරිකානු ජනාධිපති ඩොනල්ඩ් ට්රම්ප් ප්රකාශ කරයි. ලබන බ්රහස්පතින්දා (පෙබරවාරි 19) වොෂින්ටන් නුවර පිහිටි “ඩොනල්ඩ් ජේ. ට්රම්ප් සාම ආයතනයේ” (පෙර අමෙරිකානු සාම ආයතනය) පැවැත්වෙන විශේෂ රැස්වීමකදී මේ පිළිබඳව නිල වශයෙන් නිවේදනය කිරීමට නියමිතය. ඊශ්රායල – හමාස් සාම ගිවිසුමේ කොටසක් ලෙස ස්ථාපිත කරන ලද මෙම මණ්ඩලය, හමාස් සංවිධානය නිරායුධ වීමෙන් පසු ගාසා තීරයේ අභ්යන්තර ආරක්ෂාව සහ පාලනය පවත්වාගෙන යාම සඳහා ජාත්යන්තර මට්ටමේ හමුදා සහ පොලිස් කණ්ඩායම් යෙදවීමට ද සැලසුම් කර ඇත.
මෙම සාම මණ්ඩලයේ සාමාජික රටවල් 20ක පමණ නායකයින් සහ නියෝජිතයින් සහභාගී වන මෙම හමුව, ගාසා තීරයේ අනාගතය තීරණය කෙරෙන තීරණාත්මක සන්ධිස්ථානයක් වනු ඇතැයි ට්රම්ප් මහතා සිය Truth Social ගිණුමෙහි සටහනක් තබමින් සඳහන් කර තිබේ. ඉන්දුනීසියාව වැනි රටවල් දැනටමත් සාම සාධක කටයුතු සඳහා භටයින් ලබාදීමට එකඟතාව පළ කර ඇති අතර, මෙම නව යාන්ත්රණය එක්සත් ජාතීන්ගේ සංවිධානයට පරිබාහිරව ක්රියාත්මක වන ප්රබල ජාත්යන්තර ආයතනයක් ලෙස වර්ධනය කිරීම ට්රම්ප්ගේ අරමුණ වී ඇත.
