සමාජයේ විවිධ පාර්ශ්වයන්ගෙන් භික්ෂූන් වහන්සේලා වෙත එල්ල වන චෝදනා සහ විවේචන සම්බන්ධයෙන් උකටලී නොවී, උපේක්ෂා සහගතව කටයුතු කිරීම වඩාත් බුද්ධිගෝචර වන බව අස්ගිරි විහාර පාර්ශ්වයේ අනුනායක පූජ්ය නාරම්පනාවේ ආනන්ද හිමියෝ පවසති. එවැනි අවස්ථාවලදී නිහඬව සිටීම වඩාත් කාලෝචිත බවත්, ඒ හරහා දිනෙක සත්යය ලෝකයට හෙළි වනු ඇති බවත් උන්වහන්සේ වැඩිදුරටත් අවධාරණය කළහ.
පූජ්ය නාරම්පනාවේ ආනන්ද හිමියන් වෙනුවෙන් පැවැත්වූ හරසර දැක්වීමේ පූණ්ය මහෝත්සවයක් බදුල්ල ඓතිහාසික මුතියංගන රාජමහා විහාරස්ථානයේදී පැවැත්වුණු අතර, එහිදී අනුශාසනාවක් කරමින් උන්වහන්සේ මෙම අදහස් පළ කළහ. ඇතැම් පිරිස් භික්ෂූන් වහන්සේලාගේ සේවය අගයමින් පවත්වන උපහාර උත්සව පවා විවේචනයට ලක් කරන බව පෙන්වා දුන් අනුනාහිමියන්, එවැනි දෑ සම්බන්ධයෙන් කලබල නොවී උපේක්ෂාවෙන් යුතුව ශාසනික කටයුතුවල නිරත විය යුතු බව මහා සංඝරත්නයෙන් ඉල්ලා සිටියහ.
ශ්රී ලංකාව තුළ තවමත් සම්බුද්ධ ශාසනයට සහ තෙරුවන් කෙරෙහි දැඩි භක්තියක් ඇති 90%ක පමණ අතිවිශාල පිරිසක් සිටින බව ද උන්වහන්සේ මෙහිදී සිහිපත් කළහ. එවැනි ශ්රද්ධාවන්ත දායක පිරිසකගේ හදවත් තුළ ඇති ප්රසාදය කිසිදා වියැකී නොයන බවත්, ඔවුන් එදත් අදත් හෙටත් ගිහි පැවිදි සබඳතාව මැනවින් පවත්වා ගනිමින් ශාසනයේ උන්නතිය උදෙසා කටයුතු කරනු ඇති බවත් අනුනාහිමියන් වැඩිදුරටත් සඳහන් කළහ.
