සූරියවැව, වැවේගම ප්රදේශයේ රහසිගතව කම්මලක් පවත්වාගෙන යමින් ගිනිඅවි නිෂ්පාදනය කර අලෙවි කිරීමේ ජාවාරමක නිරත වූ සහෝදරයන් දෙදෙනෙකු තංගල්ල කොට්ඨාස අපරාධ විමර්ශන ඒකකය විසින් පසුගිය 15 වැනිදා අත්අඩංගුවට ගෙන තිබේ. වයස අවුරුදු 35 සහ 40 යන වයස්වල පසුවන මෙම සැකකරුවන් කලක් තිස්සේ මෙම නීතිවිරෝධී කටයුත්ත සිදුකර ඇති බව පොලිසිය පවසයි.
සැකකරුවන් සන්තකයේ තිබී අයිස් මත්ද්රව්ය මිලිග්රෑම් 3,400ක්, මෙරට නිෂ්පාදිත බෝර 12 වර්ගයේ ජීව උණ්ඩ යෙදිය හැකි ගිනිඅවි දෙකක් සහ ඒවා නිෂ්පාදනයට ගන්නා කොටස් කිහිපයක් පොලිස් භාරයට ගෙන ඇත. මූලික ප්රශ්න කිරීම්වලදී ඔවුන් පාපොච්චාරණය කර ඇත්තේ මීට පෙර ගිනිඅවි 4ක් නිෂ්පාදනය කර විවිධ පුද්ගලයන්ට අලෙවි කර ඇති බවයි. එම ගිනිඅවි මිලදී ගත් පුද්ගලයන් කවුරුන්ද යන්න සොයා මේ වන විටත් විශේෂ විමර්ශනයක් ආරම්භ කර තිබේ.
තංගල්ල කොට්ඨාස භාර ජ්යෙෂ්ඨ පොලිස් අධිකාරී නිපුන දෙහිගම මහතාගේ උපදෙස් මත ක්රියාත්මක වූ මෙම වැටලීමෙන් පසු සැකකරුවන් හම්බන්තොට මහෙස්ත්රාත් අධිකරණයට ඉදිරිපත් කිරීමට නියමිතය. සංවිධානාත්මක අපරාධකරුවන්ට මොවුන් ගිනිඅවි සැපයූවේද යන්න පිළිබඳව ද සූරියවැව පොලිසිය වැඩිදුර පරීක්ෂණ පවත්වයි.
