කැලිෆෝනියාවේ ට්රකී (Truckee) නගරයට ආසන්න කාසල් පීක් (Castle Peak) ප්රදේශයේ ඇති වූ දරුණු හිම කුණාටුවක් සහ නායයාමක් හේතුවෙන් හිම මත ලිස්සා යාමේ ක්රීඩාවේ නිරත වූ පුද්ගලයන් 10 දෙනෙකු අතුරුදන් වී ඇති අතර තවත් 6 දෙනෙකු එම ස්ථානයේම සිරවී සිටින බව අද (18) පෙරවරුවේ වාර්තා විය. මෙම අනතුර සිදුව ඇත්තේ ඊයේ (17) දේශීය වේලාවෙන් පෙ.ව. 11:30 ට පමණ ප්රබල ශීත සෘතු කුණාටුවක් මධ්යයේය.
අනතුරට පත් වූයේ ‘Blackbird Mountain Guides’ ආයතනය විසින් සංවිධානය කරන ලද දින තුනක සංචාරයක නිරත වූ 16 දෙනෙකුගෙන් යුත් කණ්ඩායමකි. මෙයට මඟපෙන්වන්නන් (Guides) 4 දෙනෙකු සහ ගනුදෙනුකරුවන් 12 දෙනෙකු ඇතුළත් විය. මීටර් 2,500ක් (අඩි 8,200ක්) පමණ උසින් පිහිටි ෆ්රොග් ලේක් (Frog Lake) අසලදී මෙම හිම නායයාම සිදු වූ බව බලධාරීන් පවසයි.
අනතුරෙන් දිවි ගලවා ගත් පුද්ගලයින් 6 දෙනා දැනට පවතින ස්ථානයේම ටාපෝලින් රෙදි ආධාරයෙන් තාවකාලික නවාතැනක් සාදාගෙන රැඳී සිටින අතර, ඔවුන් හදිසි සංඥා (Emergency Beacons) හරහා සහන සේවකයන් සමඟ සන්නිවේදනය කරමින් සිටිති. ඉතිරි 10 දෙනා හිම තට්ටු යට වැලලී සිටින බවට සැක කෙරෙන අතර ඔවුන් පිළිබඳ මෙතෙක් තොරතුරක් අනාවරණය වී නොමැති බව නෙවාඩා ප්රාන්ත ෂෙරිෆ් කාර්යාලය (Nevada County Sheriff’s Office) තහවුරු කරයි.
මුදාගැනීමේ මෙහෙයුම් සඳහා 46 දෙනෙකුගෙන් යුත් සහන කණ්ඩායමක්, විශේෂ හිම යානා (SnoCats) සහ හිම මත ලිස්සා යාමේ කණ්ඩායම් යොදවා ඇත. කෙසේ වෙතත්, තත්පරයකට සෙන්ටිමීටර ගණනාවක හිම පතනය, පැයට කිලෝමීටර 100 ඉක්මවන සුළඟ සහ ශුන්ය දෘශ්යතාව (Zero visibility) හේතුවෙන් සහන සේවකයන්ට එම ස්ථානයට ළඟා වීම අතිශය දුෂ්කර වී තිබේ.
කැලිෆෝනියා ආණ්ඩුකාර ගැවින් නිව්සම් මහතා පවසා සිටියේ සහන කටයුතු සඳහා ප්රාන්තයේ උපරිම සම්පත් යොදවා ඇති බවයි. ප්රදේශයට තවදුරටත් දැඩි හිම කුණාටු සහ නායයාම් අවදානමක් පවතින බවට කාලගුණ අංශ විසින් අනතුරු ඇඟවීම් නිකුත් කර ඇත.
