ද්විපාර්ශ්වික සබඳතා කෙතරම් විකාශනය වුවද, චීන සහ ඇමෙරිකානු ජනතාව අතර පවතින හුවමාරුව සහ සහයෝගීතාවය සඳහා වූ කැමැත්ත වෙනස් නොවන බව චීන ජනාධිපති ෂී ජින්පින්ග් ප්රකාශ කර තිබේ. ජනාධිපති ඩොනල්ඩ් ට්රම්ප් සමඟ අප්රේල් මාසයේදී පැවැත්වීමට නියමිත හමුවට පෙර, අයෝවා ප්රාන්තයේ සිටින සිය පැරණි මිතුරන් වෙත පිළිතුරු ලිපියක් යොමු කරමින් ඔහු මේ බව සඳහන් කර ඇත. “චීන-ඇමෙරිකානු සබඳතාවල බලාපොරොත්තුව රැඳී ඇත්තේ ජනතාව මතයි” යනුවෙන් ෂී ජින්පින්ග් පසුගිය සඳුදා ලියූ එම ලිපියේ සඳහන් වූ බව ෂින්හුවා පුවත් සේවය වාර්තා කරයි.
1985 වසරේදී චීනයේ හෙබෙයි පළාතෙන් අයෝවා වෙත ගිය දූත පිරිසක නායකයා ලෙස කටයුතු කළ ෂී ජින්පින්ග් හමුවූ ව්යාපාරික ලූකා බෙරෝන් සහ සාරා ලෑන්ඩ් වැනි මිතුරන් එවූ නව වසරේ සුබපැතුම් පණිවුඩයකට පිළිතුරු ලෙස මෙම ලිපිය යොමු කර ඇත. 2025 වසරේදී ට්රම්ප් විසින් අමතර 100% ක තීරුබදු පැනවීමට තර්ජනය කිරීම හේතුවෙන් දෙරට අතර සබඳතා යම් කැළඹිලි ස්වභාවයක් ගත්තද, ඔක්තෝබර් මාසයේදී දකුණු කොරියාවේදී පැවැති ට්රම්ප්-ෂී සාකච්ඡා හරහා වෙළඳ සටන් විරාමය වසරකින් දීර්ඝ කර ගැනීමට දෙරට සමත් විය.
මෑත කාලීනව දෙරටේ ජනතාව අතර සබඳතා නව මුහුණුවරකින් වර්ධනය වී ඇති අතර, ට්රම්ප් විසින් ටික්ටොක් (TikTok) තහනම් කිරීමට ගත් උත්සාහය නිසා ඇමෙරිකානු පරිශීලකයින් චීනයේ ‘රෙඩ්නෝට්’ (RedNote) වැනි යෙදුම් වෙත යොමු වී ඇත. මීට අමතරව, ඇමෙරිකාවේ ‘Gen Z’ පරම්පරාව අතර චීන සංස්කෘතික පුරුදු වැළඳ ගැනීමේ “Chinamaxxing” රැල්ලක් ද නිර්මාණය වී ඇති අතර චීනය තාක්ෂණික සුපිරි බලවතෙකු ලෙස ඔවුන් හඳුනා ගැනීම මීට හේතු වී තිබේ. පෙබරවාරි මුලදී ට්රම්ප් සහ ෂී අතර පැවති දුරකථන සංවාදයකදී තායිවානය සහ ආරක්ෂක ගැටලු පිළිබඳව සාකච්ඡා වූ අතර, එහිදී අයෝවා ප්රාන්තය ප්රධාන නිෂ්පාදකයෙකු වන සෝයා බෝංචි ඇතුළු ඇමෙරිකානු කෘෂි නිෂ්පාදන මිලදී ගැනීම වැඩි කිරීමට චීනය එකඟ වී ඇත. ජනාධිපති ට්රම්ප් අප්රේල් මාසයේදී චීනයේ සංචාරය කිරීමට සැලසුම් කර ඇති අතර, 2026 වසර අවසානයේදී ජනාධිපති ෂී ජින්පින්ග් ඇමෙරිකාවේ සංචාරය කිරීමට නියමිතය.
