දූෂණ චෝදනා ඇතුළු නඩු කිහිපයකට වරදකරු වී රාවල්පින්ඩිහි අඩියාලා (Adiala) බන්ධනාගාරයේ රඳවා සිටින පාකිස්තානයේ හිටපු අග්රාමාත්ය සහ 1992 ලෝක කුසලාන ජයග්රාහී නායක ඉම්රාන් ඛාන්ගේ සෞඛ්ය තත්ත්වය පිළිබඳව ජාත්යන්තර ක්රිකට් ප්රජාව සිය දැඩි කනස්සල්ල පළ කර තිබේ. ඔහුගේ සෞඛ්යය දිනෙන් දින පිරිහීම සැලකිල්ලට ගෙන, ඔහුට මානුෂීය ලෙස සලකන ලෙසත් වහාම විශේෂඥ වෛද්ය ප්රතිකාර ලබා දෙන ලෙසත් ඉල්ලමින් ලොව ප්රකට ක්රිකට් නායකයින් 14 දෙනෙකු පාකිස්තාන අග්රාමාත්ය ෂෙබාස් ෂරීෆ් වෙත ඒකාබද්ධ ලිපියක් යොමු කර ඇත.
ඉන්දියාවේ සුනිල් ගවස්කාර් සහ කපිල් දේව්, බටහිර ඉන්දීය කොදෙව්හී ක්ලයිව් ලොයිඩ්, ඕස්ට්රේලියාවේ ඇලන් බෝඩර්, ස්ටීව් වෝ, ඉයන් චෙපල් සහ ග්රෙග් චෙපල්, එංගලන්තයේ ඩේවිඩ් ගවර්, නසාර් හුසේන් සහ මයික් ඇතර්ටන් මෙන්ම නවසීලන්තයේ ජෝන් රයිට් ඇතුළු ප්රවීණ නායකයින් රැසක් මෙම ලිපියට අත්සන් තබා තිබේ. ක්රීඩාවේ ජීව ගුණය පෙරදැරිව, දේශපාලනයෙන් බැහැරව මානුෂීය පදනමක් මත මෙම ඉල්ලීම සිදු කරන බව ඔවුහු අවධාරණය කරති.
ඉම්රාන් ඛාන්ගේ දකුණු ඇසෙහි පෙනීම 85%කින් පමණ අහිමි වී ඇති බවට ඔහුගේ පවුලේ සාමාජිකයන් සහ නීතිඥයන් මෑතකදී අනාවරණය කළහ. පවතින සෞඛ්ය ගැටලුවලට බන්ධනාගාරය තුළදී නිසි ප්රතිකාර නොලැබීම නිසා මෙම තත්ත්වය උග්ර වී ඇති බව කියැවේ. පසුගිය පෙබරවාරි 15 වැනිදා ශ්රේෂ්ඨාධිකරණ නියෝගයක් මත ඔහු රෝහල්ගත කිරීමට බන්ධනාගාර බලධාරීන් පියවර ගත් බව වාර්තා වුවද, ඔහුගේ පෞද්ගලික වෛද්යවරුන්ට ඔහු පරීක්ෂා කිරීමට තවමත් නිසි අවසරයක් ලැබී නොමැති බව ඔහුගේ පක්ෂය චෝදනා කරයි.
1971 සිට 1992 දක්වා පාකිස්තානය වෙනුවෙන් විශිෂ්ට දක්ෂතා දැක්වූ ඉම්රාන් ඛාන්, ටෙස්ට් තරග 88කදී කඩුලු 362ක් ලබා ගනිමින් සහ එක්දින තරග 175කදී පාකිස්තානය මෙහෙයවමින් එරට ක්රිකට් ක්රීඩාව ලෝක සිතියමේ ඉහළින්ම සටහන් කළ වීරයෙකි. ඔහු වැනි ලෝක පූජිත ක්රීඩකයෙකුට බන්ධනාගාරය තුළදී හිමිවිය යුතු අවම ගෞරවය සහ ජාත්යන්තර ප්රමිතීන්ට අනුකූල රැකවරණය ලබා දෙන ලෙස මෙම ලිපිය මඟින් රජයෙන් ඉල්ලා ඇත.
