පෞද්ගලික ආරවුලක් හේතුවෙන් සිය ඥාතියෙකුට වෙඩි තබා ඝාතනය කිරීමේ වරදට වරදකරුවන් වූ පුද්ගලයන් දෙදෙනෙකුට මරණ දඬුවම පැනවීමට බලපිටිය මහාධිකරණ විනිසුරු රුචිර වැලිවත්ත මහතා ඊයේ (17) නියෝග කළේය.
මරණ දඬුවම නියම වූයේ මීටියාගොඩ, හගරන්වත්ත ප්රදේශයේ පදිංචි අයි. අසන්ත නොහොත් ‘ජෝන් කොල්ලා’ සහ එන්.ඩබ්ලිව්.ජී. ඉන්ද්රසිරි ජිනපාල යන විත්තිකරුවන්ටය. ඔවුන් දෙදෙනා සහ මරණකරු එකම ගම්මානයක පදිංචි ඥාතීන් බව අධිකරණයේදී අනාවරණය විය.
2014 සැප්තැම්බර් මස 24 වන දින මීටියාගොඩ ප්රදේශයේදී ඒ. ප්රදීප් කුමාර නැමැති අයට ‘ෂෝට්ගන්’ වර්ගයේ තුවක්කුවකින් වෙඩි තබා ඝාතනය කිරීම සම්බන්ධයෙන් නීතිපතිවරයා විසින් මොවුන්ට එරෙහිව අධිචෝදනා ගොනු කර තිබුණි.
පළමු විත්තිකරු මීටර් 5ක් පමණ සමීපයේ සිට එල්ල කළ වෙඩි ප්රහාරයෙන් මරණකරුගේ හිස්කබල පසාරු කරගෙන ගොස් මොළයට සිදු වූ බරපතල හානි හේතුවෙන් මෙම මරණය සිදුව ඇති බව වෛද්ය සාක්ෂි මගින් තහවුරු විය. පැමිණිල්ල විසින් ඉදිරිපත් කළ සාක්ෂි සාධාරණ සැකයකින් ඔබ්බට ඔප්පු වී ඇති බව විනිසුරුවරයා මෙහිදී අවධාරණය කළේය.
මෙම අපරාධය සම්බන්ධයෙන් විමර්ශන මෙහෙයවා තිබුණේ මීටියාගොඩ පොලිසිය විසිනි. රජයේ අධිනීතිඥ සෙනුරි ගුණතිලක මහත්මිය පැමිණිල්ල වෙනුවෙන් පෙනී සිටියාය.
