රජය විසින් හඳුන්වා දීමට යෝජිත නව ජාතික විදුලි බල ප්රතිපත්තිය හරහා සාමාන්ය පාරිභෝගිකයා මත දැඩි බදු බරක් පැටවීමට සූදානම් වන බවට විදුලිය පාවිච්චිකරන්නන්ගේ සංගමය චෝදනා කරයි. මෙම නව ප්රතිපත්තිය යටතේ මෙතෙක් සහන ලැබූ අඩු ආදායම්ලාභී පිරිස සීමා කර ඇති බවත්, මීට පෙර කිසිලෙසක සිදු නොවූ ආකාරයට වීදි ලාම්පු සඳහා වන පිරිවැය ද පාරිභෝගිකයාගෙන් අය කිරීමට යෝජනා වී ඇති බවත් එම සංගමය පෙන්වා දෙයි.
විදුලිය පාවිච්චිකරන්නන්ගේ සංගමයේ ජාතික ලේකම් සංජීව ධම්මික මහතා සඳහන් කළේ, වීදි ලාම්පු සඳහා විදුලි බිල්පතේ අගයෙන් 2.2%ක් දක්වා අතිරේක මුදලක් අය කිරීමට රජය සැලසුම් කර ඇති බවයි. මීට අමතරව නව විදුලි බද්දක් ද හඳුන්වා දී ඇති අතර, මෙම පීඩනය දරාගත නොහැකි බව හෙතෙම අවධාරණය කළේය.
රජයේ මෙම ක්රියාකලාපයට සිය දැඩි විරෝධය පළ කරමින් සංජීව ධම්මික මහතා මෙලෙස අදහස් දැක්වීය. “අපිට ලයිට් එපා, අපි හුළුඅතු පත්තු කරගෙන පාරේ යන්නම්. ජාතික ආරක්ෂාව ගැන ආණ්ඩුව බලාගන්න, අපි හුළුඅතු බැඳගෙන යන්නම්. ලයිට් ගලවාගෙන යන්න, අපි මේ අසාධාරණ බිල් ගෙවන්න ලෑස්ති නැහැ.” යනුවෙන් ඔහු පැවසීය. විදුලි බිල්පතට අලුතින් එක්වන මෙම බදු සහ ගාස්තු හේතුවෙන් ඉදිරියේදී සාමාන්ය ජනතාවගේ ජීවන වියදම තවදුරටත් ඉහළ යනු ඇති බවට එම සංගමය අනතුරු අඟවයි.
