ඉදිරි මාර්තු මාසයේදී ආරම්භ වන ප්රී-මොන්සූන් (Pre-monsoon) හෙවත් මෝසම් පූර්ව කාලසීමාවට සමගාමීව වයඹදිග ඉන්දියාවේ දිවා සහ රාත්රී උෂ්ණත්වය සැලකිය යුතු ලෙස ඉහළ යනු ඇතැයි ඉන්දීය කාලගුණ විද්යා දෙපාර්තමේන්තුව (IMD) අද (19) ප්රකාශ කළේය. බටහිර කැළඹිලි තත්ත්වයක් (Western Disturbance) හේතුවෙන් මීට පෙර උෂ්ණත්වය තරමක් පහළ ගියද, ඉදිරි දින කිහිපය තුළ එය යළිත් සෙල්සියස් අංශක 3-4 කින් පමණ ඉහළ යනු ඇතැයි අපේක්ෂා කෙරේ.
IMD අධ්යක්ෂ ජනරාල් එම්. මොහපාත්රා මහතා සඳහන් කළේ ඉදිරි ඉරිදා දිනයේදී තවත් සුළු බටහිර කැළඹිලි තත්ත්වයක් අපේක්ෂා කළද, ඉන් උෂ්ණත්වයේ විශාල වෙනසක් සිදු නොවනු ඇති බවයි. දැනටමත් ජම්මු-කාශ්මීරය, පන්ජාබ්, ගුජරාටය සහ උත්තර ප්රදේශ් වැනි ප්රාන්තවල උෂ්ණත්වය සාමාන්ය මට්ටමට වඩා සෙල්සියස් අංශක 3-5 කින් ඉහළ ගොස් පවතී. මේ අතර දකුණු තමිල්නාඩුවට සහ කේරළයට එළඹෙන සති අන්තයේ තද වැසි ඇති විය හැකි බවට ද අනාවැකි පළ කර ඇත.
මෙලෙස උෂ්ණත්වය අසාමාන්ය ලෙස ඉහළ යාම රබී (Rabi) භෝග වගාවන්ට, විශේෂයෙන්ම තිරිඟු සහ බාර්ලි වගාවන්ට අහිතකර ලෙස බලපෑ හැකි බව කාලගුණ අංශ අනතුරු අඟවයි. උෂ්ණත්වය වැඩි වීම නිසා භෝග නියමිත කාලයට පෙර මේරීම (Forced maturity) සිදු විය හැකි අතර, එමඟින් අස්වැන්න අඩු වීම සහ ධාන්යවල ගුණාත්මකභාවය පිරිහීම වැනි ගැටලු ඇති විය හැකි බව ඔවුන්ගේ උපදේශන වාර්තාවල දැක්වේ.
