බටහිර රටවල් පනවා ඇති සම්බාධක හේතුවෙන් ශ්රී ලංකාවට පැමිණෙන රුසියානු පුරවැසියන් සහ මෙරට වෙසෙන රුසියානුවන් දැඩි පීඩාවකට පත්ව ඇති බව ශ්රී ලංකාවේ රුසියානු තානාපති ලෙවන් ජගර්යන් (Levan Dzhagaryan) මහතා පවසයි. කොළඹදී පැවති මාධ්ය හමුවකදී ඔහු අවධාරණය කළේ, රුසියානු ජනතාවට එරෙහිව පනවා ඇති මෙම බාධක ‘සමූහ දඬුවමක්’ (collective punishment) බඳු බවයි. විශේෂයෙන්ම වීසා සහ මාස්ටර්කාඩ් (Visa/Mastercard) වැනි ජාත්යන්තර ගෙවීම් පද්ධති අවහිර වීම නිසා රුසියානු සංචාරකයින්ට මෙරටදී මුදල් ගනුදෙනු කිරීමේදී දැඩි ගැටලු පැන නැගී ඇති බවත්, තම පෞද්ගලික කාඩ්පත පවා අවහිර වී ඇති බවත් ඔහු මෙහිදී අනාවරණය කළේය.
රුසියානු ආයෝජකයින් ශ්රී ලංකාවට පැමිණීමට උනන්දුවක් දැක්වුවද, මෙම සම්බාධක නිසා ඇති වී තිබෙන බැංකු සහ මූල්ය බාධක හමුවේ එම අවස්ථාවන් ඇනහිට ඇති බව තානාපතිවරයා පෙන්වා දෙයි. රුසියාව විසින් මෙරටට යෝජනා කළ න්යෂ්ටික බලාගාර ව්යාපෘතිය ඇතුළු ආර්ථික සහයෝගිතා වැඩසටහන් ද මෙමගින් ප්රමාද වී තිබේ. මෙම තත්ත්වයට විසඳුමක් ලෙස රුසියානු ‘MIR’ කාඩ්පත් ක්රමය මෙරටට හඳුන්වා දීමට යෝජනා කළත්, ද්විතීයික සම්බාධකවලට (secondary sanctions) බියෙන් ශ්රී ලංකාව එය ක්රියාත්මක කිරීමට මැළිකමක් දක්වන බව ඔහු සඳහන් කළේය. කෙසේ වෙතත්, රුසියානු සංචාරකයින් දැනට චීන ගෙවීම් කාඩ්පත් හෝ වෙනත් ස්වාධීන රාජ්යයන්ගේ කාඩ්පත් හරහා සිය අවශ්යතා සපුරා ගැනීමට උත්සාහ කරන බව ද හෙළි විය.
