ඉන්දියාවේ ගුරුග්රම් (Gurugram) නගරයේ සෙක්ටර් 37 කාර්මික කලාපයට ආසන්න හිස් ඉඩමක තුන් හැවිරිදි දැරියක දූෂණය කර, ඝාතනය කර වළ දමා තිබියදී අද (20) අලුයම පොලිසිය විසින් සොයාගෙන තිබේ. මෙම සාහසික අපරාධය සම්බන්ධයෙන් එම දැරිය පදිංචිව සිටි ගොඩනැගිල්ලේම පදිංචි 24 හැවිරිදි පුද්ගලයෙකු අත්අඩංගුවට ගෙන ඇත.
බිහාර් ප්රාන්තයේ සුපෝල් දිස්ත්රික්කයේ සිට පැමිණ නිෂ්පාදන ආයතනයක සේවය කරන සැකකරු, ඊයේ (19) සවස 7:00ට පමණ දැරිය සෙල්ලම් කරමින් සිටියදී ඇයව රවටා කිලෝමීටර් 4ක් පමණ ඈතින් පිහිටි පාළු ප්රදේශයකට රැගෙන ගොස් තිබේ. එහිදී දැරිය දූෂණය කර ඇති ඔහු, පසුව ඇයගේ ගෙල මිරිකා ඝාතනය කර නොගැඹුරු වළක දමා පළා ගොස් ඇති බව පොලිසිය පවසයි.
දැරිය අතුරුදහන් වීම සම්බන්ධයෙන් ඇයගේ දෙමාපියන් අද අලුයම 12:15ට පමණ පොලිසියට පැමිණිලි කර ඇත. වහාම පරීක්ෂණ ආරම්භ කළ ගුරුග්රම් පොලිසිය, ප්රදේශයේ CCTV දර්ශන පරීක්ෂා කිරීමේදී සැකකරු දැරිය රැගෙන යන අයුරු හඳුනාගෙන තිබේ. ඒ අනුව අත්අඩංගුවට ගත් සැකකරුගෙන් ප්රශ්න කිරීමේදී ඔහු කළ අපරාධය පාපොච්චාරණය කර ඇති අතර, ඔහුගේ මගපෙන්වීම මත අද අලුයම 2:00ට පමණ දැරියගේ දේහය සොයාගෙන ඇත.
සැකකරු මීට පෙරද එම දැරිය සමඟ නිතර සෙල්ලම් කර ඇති බැවින් දැරිය ඔහු කෙරෙහි විශ්වාසය තබා ඇති බව විමර්ශනවලදී හෙළි වී තිබේ. අධිකරණ වෛද්ය නිලධාරීන් සහ විශේෂ පොලිස් කණ්ඩායම් මේ වන විට වැඩිදුර සාක්ෂි එකතු කරමින් සිටියි.
