නවදිල්ලි නුවර පැවැත්වෙන AI IMPACT 2026 සමුළුවට සහභාගී වී සිටින ජනාධිපති අනුර කුමාර දිසානායක මහතා, ලොව ප්රබල රාජ්ය නායකයන් කිහිපදෙනෙකු සමඟ ද්වීපාර්ශ්වීය සාකච්ඡා පවත්වා තිබේ. ඉන්දීය අග්රාමාත්ය නරේන්ද්ර මෝදි මහතා පිරිනැමූ රාත්රී භෝජන සංග්රහයකට ද එක්වූ ජනාධිපතිවරයා, එහිදී රාජ්ය තාන්ත්රික සබඳතා ශක්තිමත් කරගැනීම පිළිබඳව අවධානය යොමු කළේය.
ඉන්දියාව: සමුළුවට පැමිණි ජනාධිපතිවරයාව ඉන්දීය අග්රාමාත්ය නරේන්ද්ර මෝදි මහතා විසින් ඉතා හරසරින් පිළිගනු ලැබීය. ලොව වේගවත්ම ආර්ථික වර්ධනයක් හිමි, තාක්ෂණික සහ අභ්යවකාශ ගවේෂණ අතින් ඉදිරියෙන්ම සිටින ඉන්දියාව සමඟ පවතින “සහෝදර රාජ්ය” සබඳතාව තවදුරටත් වර්ධනය කරගැනීම මෙහි මූලික අරමුණ විය.
ප්රංශය: යුරෝපා සංගමයේ ප්රබල රාජ්යයක් වන ප්රංශයේ ජනාධිපති එමානුවෙල් මැක්රෝන් මහතා ද ජනාධිපති අනුර කුමාර දිසානායක මහතා හමුවිය. නිෂ්පාදන ආර්ථිකය අතින් යුරෝපයේ තෙවන ස්ථානය හිමි ප්රංශය සමඟ ආර්ථික සබඳතා පුළුල් කරගැනීම පිළිබඳව මෙහිදී දීර්ඝව සාකච්ඡා කෙරිණි.
බ්රසීලය: භූමි ප්රමාණයෙන් ලොව පස්වන විශාලතම රට වන බ්රසීලයේ ජනාධිපති ලූලා ද සිල්වා මහතා හමු වූ ජනාධිපතිවරයා, දෙරට අතර සහයෝගීතාව වර්ධනය කරගැනීම පිළිබඳව විශේෂ සාකච්ඡාවක නිරත විය. ස්වාභාවික සම්පත්වලින් පොහොසත් බ්රසීලය සමඟ වෙළඳ සබඳතා ඇති කරගැනීම මෙහිදී අවධාරණය කෙරිණි.
එක්සත් අරාබි එමීර් රාජ්යය: අබුඩාබියේ ඔටුන්න හිමි කුමරු වන ෂෙයික් අල් නහ්යාන් මහතා සමඟ පැවැති සාකච්ඡාවේදී බලශක්ති, මූල්ය සහ සංචාරක ක්ෂේත්ර පිළිබඳව අවධානය යොමු විය. ලොව ප්රබලතම බලශක්ති මධ්යස්ථානයක් වන අබුඩාබියේ ආයෝජන ශ්රී ලංකාවට ලබාගැනීම පිළිබඳව නායකයන් අදහස් හුවමාරු කරගත්හ.
භූතානය: සංස්කෘතික සහ ආගමික වශයෙන් ශ්රී ලංකාවට සමීප භූතානයේ අග්රාමාත්ය ෂෙරින් ටොක්ගේ මහතා සමඟ ද ජනාධිපතිවරයා සාකච්ඡා පැවැත්වීය. ස්වාභාවික පරිසරය සුරැකීම සහ සංස්කෘතික සබඳතා වර්ධනය කරගැනීම මෙහිදී ප්රධාන විය.
මෙම රාජ්ය තාන්ත්රික හමුවීම් හරහා ශ්රී ලංකාවේ අනාගත ආර්ථික සහ තාක්ෂණික ගමන් මගට ප්රබල ජාත්යන්තර සහයෝගීතාවක් හිමිවනු ඇතැයි අපේක්ෂා කෙරේ.
