2026 තමිල්නාඩු ප්රාන්ත සභා මැතිවරණය සඳහා තමිල්නාඩු වෙට්රි කසාගම් (TVK) පක්ෂය සූදානම් වෙද්දී, එහි නායක ප්රකට නළු විජේ තරඟ කරනු ලබන මැතිවරණ කොට්ඨාසය පිළිබඳව මේ වන විට දැඩි අවධානයක් යොමුව තිබේ. කිසිදු පක්ෂයක් සමඟ සන්ධානගත නොවී ආසන 234 සඳහාම තනිව තරඟ කිරීමට තීරණය කර ඇති විජේ, සිය පළමු මැතිවරණ සටන සඳහා වඩාත් සුදුසු කොට්ඨාසය තෝරා ගැනීමට මේ දිනවල සැලසුම් කරමින් සිටින බව වාර්තා වේ. විශේෂයෙන්ම “V” අකුර කෙරෙහි පවතින විශ්වාසය මත විජේ සිය පළමු දේශපාලන සමුළුව ද වික්රවන්ඩි (Vikravandi) හි පැවැත්වූ අතර, ඔහු තරඟ කරන කොට්ඨාසය ද “V” අකුරෙන් ආරම්භ වීමට වැඩි ඉඩක් ඇති බව දේශපාලන ආරංචි මාර්ග පවසයි. ඒ අනුව වික්රවන්ඩි, වේලාචෙරි සහ විරුගම්බක්කම් යන කොට්ඨාස කෙරෙහි අවධානය යොමුව ඇති අතර, වඩාත්ම වැඩි සම්භාවිතාවක් පවතින්නේ වේදරන්යම් (Vedaranyam) මැතිවරණ කොට්ඨාසය සඳහා බව පැවසේ.
වේදරන්යම් කොට්ඨාසයේ ඉතිහාසය දෙස බැලීමේදී, 1962 දී පිහිටුවන ලද මෙම කොට්ඨාසය තුළ DMK පක්ෂය හය වතාවක් ජයග්රහණය කර ඇති අතර, 2011 වසරේ සිට AIADMK පක්ෂය අඛණ්ඩව ජයග්රහණය කරමින් සිටී. වත්මන් තත්ත්වය අනුව AIADMK ප්රබලයෙකු වන O.S. මනියන් 2016 සහ 2021 මැතිවරණ දෙකම ජයග්රහණය කරමින් මෙම ආසනය සිය පක්ෂය සතුව රඳවාගෙන සිටියි. මෙහි ජන විකාශනය සැලකීමේදී ධීවර සහ ගොවි ජනතාව විශාල වශයෙන් වෙසෙන බැවින්, ඔවුන්ගේ සහයෝගය ලබා ගැනීම විජේගේ ප්රධාන ඉලක්කයක් වී ඇති බව පෙනේ. කෙසේ වෙතත්, නාම් තමිලර් පක්ෂය (NTK) වෙනුවෙන් ඉදුම්බාවනම් කාර්තික් දැනටමත් මෙම කොට්ඨාසයට තරඟ කරන බව නිවේදනය කර ඇති බැවින්, විජේ මෙයට අවතීර්ණ වුවහොත් එය ප්රබල තුන්කොන් සටනක් වනු නිසැකය.
