රටේ බන්ධනාගාර පද්ධතිය මුහුණ දී ඇති දැඩි තදබදයට විසඳුමක් ලෙස, තෝරාගත් සිරකරුවන් විද්යුත් අධීක්ෂණය යටතේ නිවාස අඩස්සියේ තැබීමට හැකි වන පරිදි නව පනතක් කෙටුම්පත් කරමින් සිටින බව ජාතික ඒකාබද්ධතා සහ අධිකරණ අමාත්ය හර්ෂණ නානායක්කාර මහතා ප්රකාශ කළේය. ඊයේ (19) පැවති මාධ්ය හමුවකදී අමාත්යවරයා පෙන්වා දුන්නේ 10,000 ක ධාරිතාවක් ඇති මෙරට බන්ධනාගාරවල දැනට රැඳවියන් 39,000 කට අධික පිරිසක් සිටින බවයි. මොවුන්ගෙන් බහුතරයක් මත්ද්රව්ය චෝදනා මත රිමාන්ඩ් බන්ධනාගාරගතව සිටින පිරිස් බව ද ඔහු සඳහන් කළේය.
අධිකරණ පද්ධතියේ පවතින ප්රමාදයන් පිළිබඳව ද අදහස් දැක්වූ අමාත්යවරයා, මෙරට මිලියනයක ජනගහනයකට සිටින්නේ විනිසුරුවරුන් 20 ක් වැනි සුළු පිරිසක් බවත්, එය සංවර්ධිත රටවල පවතින 40-60 මට්ටමට වඩා බෙහෙවින් අඩු බවත් පැවසීය. මෙම තත්ත්වය මගහරවා ගැනීම සඳහා කොළඹ අලුත්කඩේ අධිකරණ සංකීර්ණයේ පහක් ඇතුළුව නව අධිකරණ හතක් ඉදිරි සති කිහිපය තුළ විවෘත කිරීමට නියමිතය. එසේම, අගවිනිසුරු ප්රීති පද්මන සූරසේන මහතාගේ මූලිකත්වයෙන් ශ්රේෂ්ඨාධිකරණය සහ අභියාචනාධිකරණය තුළ කඩදාසි රහිත “ඊ-ගොනු කිරීමේ” (E-filing) ක්රමවේදය දැනටමත් ආරම්භ කර ඇති අතර එය ඉදිරියේදී පළාත් අධිකරණ දක්වා ව්යාප්ත කිරීමට සැලසුම් කර ඇත.
නීති පද්ධතියේ සිදුවන අනෙකුත් ප්රධාන වෙනස්කම් ලෙස, ත්රස්තවාදය වැළැක්වීමේ පනත (PTA) අවලංගු කර ජාත්යන්තර මානව හිමිකම් ප්රමිතීන්ට අනුකූල නව නීති හඳුන්වා දීමට රජය සූදානම් වේ. මේ සම්බන්ධයෙන් පෙබරවාරි 28 දක්වා මහජන අදහස් විමසීමට අවස්ථාව ලබා දී ඇත. එසේම, ස්වාධීන රජයේ නඩු පවරන අධ්යක්ෂවරයෙකුගේ (Director of Public Prosecutions) කාර්යාලයක් පිහිටුවීමට ද ප්රතිපත්තිමය තීරණයක් ගෙන ඇති අතර එහි මූලික කෙටුම්පත අප්රේල් මාසය වන විට සකස් වනු ඇත. මීට අමතරව, අකුරේගොඩදී නීතිඥවරයෙකු ඝාතනය කිරීම සම්බන්ධයෙන් සැකකරුවන් සිව්දෙනෙකු අත්අඩංගුවට ගෙන ඇති බවත්, නීති ක්ෂේත්රයේ සාමාජිකයන්ගේ ආරක්ෂාව තහවුරු කිරීමට පියවර ගන්නා බවත් අමාත්යවරයා වැඩිදුරටත් සහතික විය.
