කැනඩාවේදී ඝාතනයට ලක්වූ හර්දීප් සිං නිජ්ජර්ගේ නඩුවට අදාළ ඇතැම් සංවේදී තොරතුරු ප්රසිද්ධ කිරීම වළක්වන ලෙස කැනඩා රජය එරට අධිකරණයෙන් ඉල්ලීමක් කර තිබේ. මෙම තොරතුරු අනාවරණය වීම ජාත්යන්තර සබඳතාවලට මෙන්ම ජාතික ආරක්ෂාවට “හානිකර” විය හැකි බව රජයේ ස්ථාවරය වී ඇත.
කැනඩාවේ නීතිපතිවරයා (Attorney General) විසින් මෙම අයදුම්පත ඉදිරිපත් කර ඇති බව ‘Global News’ පුවත් සේවය වාර්තා කරයි. අධිකරණ ලේඛන උපුටා දක්වමින් ඔවුන් පවසන්නේ, නඩුවට අදාළ ඇතැම් තොරතුරු රහසිගතව තබා ගැනීමට අවසර ඉල්ලා ඇත්තේ ඒවායේ ඇති “සංවේදී” ස්වභාවය හේතුවෙන් බවයි.
2023 ජූනි 18 වන දින බ්රිටිෂ් කොලොම්බියාහිදී නිජ්ජර් ඝාතනය කිරීමේ චෝදනාව මත ඉන්දීය ජාතිකයන් සිව්දෙනෙකුට එරෙහිව නඩු පවරා තිබේ. මෙම සිද්ධිය සම්බන්ධයෙන් ඉන්දීය රජයේ නියෝජිතයන්ගේ සම්බන්ධයක් පවතින බවට හිටපු අගමැති ජස්ටින් ටෘඩෝ කළ ප්රකාශයත් සමඟ ඉන්දියාව සහ කැනඩාව අතර රාජ්යතාන්ත්රික සබඳතා දැඩි ලෙස පළුදු විය. ඉන්දියාව මෙම චෝදනා “විකාර සහගත” සහ “දේශපාලන අරමුණු සහිත” ඒවා ලෙස හඳුන්වමින් ප්රතික්ෂේප කළේය.
මෙම සිව්දෙනාට එරෙහි නඩුව දැනට පවතින්නේ නඩු විභාගයට පෙර පූර්ව විමර්ශන මට්ටමේය (Pre-trial stage). බ්රිටිෂ් කොලොම්බියා නඩු මෙහෙයවීමේ සේවාවේ ප්රකාශකයෙකුට අනුව, නිල නඩු විභාගය 2026 අගෝස්තු මාසයට පෙර ආරම්භ වනු ඇතැයි අපේක්ෂා කළ නොහැක.
මෙම තොරතුරු වසන් කිරීමේ ඉල්ලීම හරහා කැනඩාව සහ ඉන්දියාව අතර පවතින රාජ්යතාන්ත්රික නොසන්සුන්තාවය තවදුරටත් උත්සන්න විය හැකි බව දේශපාලන විචාරකයෝ මත පළ කරති.
