ශ්රී ලංකාවේ ඇඟලුම් ක්ෂේත්රයේ දැවැන්තයා වන MAS සමූහ ව්යාපාරය සිය සේවක පිරිස 96,000 සිට 70,000 දක්වා අඩු කිරීමට පියවර ගෙන ඇති බව වාර්තා වේ. මෙම ප්රතිව්යුහගත කිරීමේ සැලැස්ම හේතුවෙන් ශ්රී ලාංකික ශ්රමිකයින් 26,000කට පමණ රැකියා අහිමි වීමේ තර්ජනයක් මතුව තිබේ. මේ වන විටත් තුල්හිරිය ‘MAS Kreeda Methliya’ කර්මාන්ත ශාලාව වසා දමා ඇති අතර, ඉදිරියේදී ‘Vaanavil’ සහ ‘MAS Active’ ඇතුළු තවත් ඒකක කිහිපයක කටයුතු නතර කිරීමට නියමිතය.
සේවක අයිතිවාසිකම් උල්ලංඝනය වන බවටත්, වෘත්තීය සමිති ක්රියාකාරකම්වලට ඉඩ නොදෙන බවටත් ආයතනයට චෝදනා එල්ල වෙමින් පවතී. මෙරටදී බදු සහන භුක්ති විඳිමින් දැවැන්ත ලාභ ලැබූ මෙම සමාගම්, දැන් අඩු ශ්රම පිරිවැය සහ සහන සොයා සිය නිෂ්පාදන කටයුතු ඉන්දියාව වෙත ව්යාප්ත කිරීමේ උපායමාර්ගයක නිරත වන බව නිරීක්ෂණය වේ. පීඩාවට පත් සේවකයින් සඳහා මාස තුනක වන්දි මුදලක් හෝ දුර බැහැර සේවයට යෑමේ විකල්ප ලබා දුන්නද, එය ප්රායෝගික නොවන බව සේවකයෝ පෙන්වා දෙති.
