මහනුවර, බූවැලිකඩ ප්රදේශයේ ජනතාවට කලක් තිස්සේ පීඩාකාරී ලෙස හැසිරෙමින්, ගිනි අවි පෙන්වා මරණීය තර්ජන එල්ල කළ බව කියන අවන්හල් හිමිකරුවෙකු ඇතුළු සැකකරුවන් තිදෙනෙකු අත්අඩංගුවට ගැනීම සඳහා මහනුවර පොලිසිය පුළුල් විමර්ශනයක් ආරම්භ කර තිබේ. මොවුන් සම්බන්ධයෙන් ප්රදේශවාසීන් විසින් මීට පෙර ද අවස්ථා කිහිපයකදීම පොලිසියට පැමිණිලි කර තිබූ බව වාර්තා වේ.
ඉකුත් 15 වැනිදා රාත්රියේ බූවැලිකඩ අනගාරික ධර්මපාල මාවතේ පදිංචි වයෝවෘද්ධ රෝගියෙකු වෙනුවෙන් පැවැත්වූ යාතුකර්මයක් අතරතුර මෙම ගැටුම හටගෙන ඇත. එහිදී අදාළ අවන්හල් හිමිකරු ඇතුළු පිරිසක් ගිනි අවි පෙන්වා එම පිරිස බියවද්දා ඇති අතර, යාතුකර්මයට ගෙන ආ පූජා භාණ්ඩවලින්ම එහි සිටි පුද්ගලයන්ට පහර දී තිබේ. පහරදීම සම්බන්ධයෙන් දැනට සැකකරුවන් සිව්දෙනෙකු අත්අඩංගුවට ගෙන ඇති නමුත්, ප්රධාන සැකකරු වන හෝටල් හිමිකරු ප්රදේශයෙන් පළාගොස් ඇත.
ප්රදේශවාසීන් පවසන පරිදි, මෙම හෝටලයේ අලුයම් කාලය වන තෙක් අධික ඝෝෂාකාරී ලෙස මත්පැන් සාද පැවැත්වීම හේතුවෙන් තමන් දැඩි පීඩාවකට පත්ව සිටිති. මෙම අනීතික ක්රියා පිළිබඳව සොයා බැලීමේදී අනාවරණය වී ඇත්තේ හෝටල් හිමිකරුවන් ප්රදේශයේ සාමකාමී පැවැත්මට දිගින් දිගටම බාධා කර ඇති බවයි. පළාගොස් සිටින සැකකරුවන් අත්අඩංගුවට ගැනීම සඳහා පොලිස් කණ්ඩායම් කිහිපයක් මේ වන විටත් මෙහෙයුම් ක්රියාත්මක කර තිබේ.
