ඉන්දීය අග්රාමාත්ය නරේන්ද්ර මෝදි මහතාගේ විශේෂ ආරාධනයකට අනුව ඉන්දියාවේ නවදිල්ලි නුවර පැවැති “AI Impact 2026” සමුළුවට සහභාගී වූ ජනාධිපති අනුර කුමාර දිසානායක මහතා සහ ඉන්දීය අගමැතිවරයා අතර විශේෂ ද්විපාර්ශ්වික සාකච්ඡාවක් පසුගිය 20 වැනිදා පැවැත්විණි. මෙම හමුව පිළිබඳව සිය නිල X (පෙර Twitter) ගිණුමේ සටහනක් තබමින් ඉන්දීය අගමැතිවරයා ප්රකාශ කර ඇත්තේ වටිනා අසල්වැසියකු සමඟ පවතින මිත්රත්වය තවදුරටත් ශක්තිමත් කරමින් ජනාධිපතිවරයා හමුවීමට ලැබීම සතුටට කරුණක් බවයි.
දෙරට අතර පවතින මෑතකාලීන සබඳතාවල ප්රගතිය මෙම හමුවේදී සමාලෝචනයට ලක් වූ අතර, ඉදිරියේදී සහයෝගිතාව වර්ධනය කරගත හැකි ක්ෂේත්ර රැසක් පිළිබඳව නායකයන් දෙපළගේ අවධානය යොමු විය. විශේෂයෙන්ම බලශක්ති ක්ෂේත්රය, යටිතල පහසුකම් සංවර්ධනය, සෞඛ්ය සේවය, කුසලතා සංවර්ධනය, සංස්කෘතික සබඳතා මෙන්ම නීල ආර්ථිකය (Blue Economy) යන ක්ෂේත්රවල නව අවස්ථාවන් පිළිබඳව මෙහිදී දීර්ඝ ලෙස සාකච්ඡා කළ බව අගමැති මෝදි මහතා සිය පණිවුඩයේ සඳහන් කර තිබේ.
මෙම සංචාරය හරහා ඉන්දියාව සහ ශ්රී ලංකාව අතර පවතින ආර්ථික සහ තාක්ෂණික සබඳතාවල නව ප්රවේශයක් සනිටුහන් වනු ඇතැයි දේශපාලන විචාරකයෝ පවසති. AI තාක්ෂණය සම්බන්ධයෙන් පැවැති මෙම සමුළුවේදී දකුණු ආසියානු කලාපය තුළ කෘතිම බුද්ධිය (AI) භාවිතය සහ එහි බලපෑම පිළිබඳව ද ශ්රී ලංකාවේ ස්ථාවරය ජනාධිපතිවරයා විසින් පැහැදිලි කරන ලදී.
