ඉන්දීය අග්රාමාත්ය නරේන්ද්ර මෝදි මහතාගේ විශේෂ ආරාධනයකට අනුව නවදිල්ලි නුවර පැවැති AI Impact 2026 ජාත්යන්තර සමුළුවට සහභාගී වූ ජනාධිපති අනුර කුමාර දිසානායක මහතා සිය නිල සංචාරය නිම කරමින් නැවත දිවයිනට පැමිණ තිබේ. මෙම සංචාරයේ විශේෂම සිදුවීම වූයේ ඉකුත් 20 වැනිදා නවදිල්ලි නුවර හයිද්රාබාද් මන්දිරයේදී ජනාධිපතිවරයා සහ ඉන්දීය අග්රාමාත්යවරයා අතර පැවැති ද්විපාර්ශ්වික සාකච්ඡාවයි. එහිදී දෙරට අතර ආර්ථික, වෙළෙඳ සහ සංස්කෘතික සබඳතා ශක්තිමත් කර ගැනීම පිළිබඳව දීර්ඝ ලෙස සාකච්ඡා කෙරුණු අතර, ‘දිට්වා’ සුළි කුණාටු ආපදාව හමුවේ ඉන්දියාව ලබාදුන් කඩිනම් සහයෝගය වෙනුවෙන් ජනාධිපතිවරයා සිය කෘතඥතාව පළ කළේය.
සමුළුව අතරතුර ජනාධිපතිවරයා ලෝක නායකයන් රැසක් සමඟ ද්විපාර්ශ්වික සාකච්ඡාවල නිරත විය. ප්රංශ ජනාධිපති එමානුවෙල් මැක්රොන්, බ්රසීල ජනාධිපති ලූලා ද සිල්වා, අබුඩාබි ඔටුන්න හිමි කුමරු ෂෙයික් කලීඩ් බින් මොහොමඩ් සහ භූතාන අගමැති ට්ෂෙරිං ටොබ්ගේ යන මහත්වරු ඒ අතර වූහ. මීට අමතරව ඇමෙරිකානු ජනාධිපති ඩොනල්ඩ් ට්රම්ප් මහතාගේ විශේෂ නියෝජිත හා ඉන්දියාවේ ඇමෙරිකානු තානාපති සර්ජියෝ ගෝර් මහතා සමඟ ද ජනාධිපතිවරයා සුහද හමුවකට එක් විය.
සමුළුව අමතමින් ජනාධිපතිවරයා අවධාරණය කළේ කෘතිම බුද්ධිය (AI) මානව සංහතියේ සංස්කෘතික වටිනාකම් හා හැකියාවන් ප්රවර්ධනය කිරීම සඳහා වගකීම් සහගත ලෙස භාවිත කළ යුතු බවයි. මෙම සංචාරය හරහා ශ්රී ලංකාවට ජාත්යන්තර මට්ටමේ තාක්ෂණික සහ දේශපාලනික සබඳතා රැසක් ගොඩනඟා ගැනීමට හැකි වී තිබේ.
