විස්සයි20 ලෝක කුසලාන ක්රිකට් තරගාවලියේ සුපිරි 8 වටයේදී එංගලන්තය හමුවේ ශ්රී ලංකා කණ්ඩායම ලැබූ දරුණු පරාජය සම්බන්ධයෙන් හිටපු නායක කුමාර් සංගක්කාර සිය දැඩි කලකිරීම පළ කර තිබේ. ඊයේ (පෙබරවාරි 22) පැවති මෙම තීරණාත්මක තරගයෙන් ශ්රී ලංකාව ලකුණු 51ක පරාජයක් ලැබීමත් සමඟ, සිය ‘X’ (පෙර Twitter) ගිණුම ඔස්සේ සටහනක් තබමින් ඔහු පෙන්වා දෙන්නේ කණ්ඩායමේ පිතිකරණය ඉතා දුර්වල මට්ටමක පැවති බවයි.
සංගක්කාරගේ විග්රහයට අනුව, ශ්රී ලංකා පන්දු යවන්නන් යම් නිසි සැලසුමකට අනුව සිය කාර්යය ඉටු කිරීමට උත්සාහ කළද, පිතිකරුවන් ඒ හා සමාන වගකීමකින් ක්රීඩා කර නොමැත. විශේෂයෙන්ම ක්රීඩාංගණයේ තණතිල්ලේ ස්වභාවය සහ තරගයේ පවතින තත්ත්වය නිවැරදිව තේරුම් ගෙන ඊට අනුකූලව ක්රීඩා කිරීමට පිතිකරුවන් අපොහොසත් වීම මෙම පරාජයට ප්රධාන හේතුවක් වූ බව ඔහු අවධාරණය කරයි.
මෙහිදී කුමාර් සංගක්කාර විශේෂයෙන්ම කමිල් මිෂාරගේ ක්රීඩා විලාසය පිළිබඳව ද සිය අදහස් දක්වා ඇති අතර, ඔහුගේ දායකත්වය උසස් මට්ටමක නොතිබූ බව පෙන්වා දී තිබේ. සමස්තයක් ලෙස ශ්රී ලංකා කණ්ඩායමෙන් දැකගත හැකි වූයේ ඉතා පසුගාමී ක්රීඩා විලාසයක් බව පවසන හිටපු නායකයා, ජාත්යන්තර මට්ටමේ තරගාවලියකදී මෙවැනි වැරදි සිදුවීම කනගාටුවට කරුණක් බව සිය සටහන මගින් ඉඟි කර ඇත.
