නව ජාතික සෞඛ්ය ප්රතිපත්තියක් කෙටුම්පත් කිරීමේ කටයුතු මේ වන විට සිදුකෙරෙමින් පවතින බවත්, එය සාර්ථක කර ගැනීම සඳහා විධිමත් ක්රියාකාරී සැලසුමක් සකස් කරන බවත් සෞඛ්ය නියෝජ්ය අමාත්ය වෛද්ය හංසක විජේමුණි මහතා ප්රකාශ කළේය. දේශීය වෛද්ය ක්රමය නූතන අවශ්යතා අනුව සංවර්ධනය කරමින් එහි සුවිශේෂතා සංචාරක ක්ෂේත්රය සමඟ බද්ධ කිරීම රජයේ ප්රධාන අරමුණක් බව ඔහු වැඩිදුරටත් අවධාරණය කළේය.
මෙරට ආයුර්වේද වෛද්ය සේවාව වඩාත් ඵලදායී සහ සැලසුම් සහගත ලෙස ඉදිරියට ගෙන යාම සඳහා විද්වතුන්ගේ සහ විශේෂඥයන්ගේ සහභාගීත්වයෙන් පැවැති විශේෂ සාකච්ඡාවකදී නියෝජ්ය අමාත්යවරයා මේ බව පැවසීය. කොළඹ පශ්චාත් උපාධි වෛද්ය ආයතනයේදී පැවැති මෙම හමුවේදී ආයුර්වේද ක්ෂේත්රයේ ගුණාත්මකභාවය ඉහළ නැංවීම සඳහා අවශ්ය ඉදිරි සැලසුම් සහ මාර්ගෝපදේශ පිළිබඳව පුළුල් ලෙස කරුණු සාකච්ඡා විය.
ආයුර්වේද සේවාවන් ගෝලීය වශයෙන් ඉන්දියාව සහ චීනය වැනි රටවල් සමඟ තරග කළ හැකි මට්ටමකට ප්රගතියක් අත්කර ගැනීම මෙහි එක් අරමුණකි. එමෙන්ම භෞතික හා මානව සම්පත් අභියෝග ජය ගැනීම සහ ආයුර්වේද පර්යේෂණ ක්ෂේත්රය පුළුල් කිරීම පිළිබඳවද අවධානය යොමු විය. රෝගී ප්රතිකාර ක්රමවේද සහ දත්ත කළමනාකරණය සඳහා විධිමත් දත්ත පද්ධතියක් (Data System) ස්ථාපනය කිරීම මෙන්ම අඩු පිරිවැයකින් ගුණාත්මක සේවාවක් ලබාදීම සහ පුනරුත්ථාපන සේවා විධිමත් කිරීම කෙරෙහිද සාකච්ඡා විය. තවද ක්ෂේත්රයේ උන්නතිය උදෙසා විශේෂඥයන්ගෙන් සැදුම්ලත් විශේෂඥ කමිටුවක් පත් කිරීමටද මෙහිදී යෝජනා විය.
පේරාදෙණිය විශ්වවිද්යාලයේ වෛද්ය පීඨයේ හිටපු මහාචාර්ය රස්නායක එම්. මුදියන්සේ මහතාගේ මෙහෙයවීමෙන් පැවැති මෙම කතිකාවතට ලෝක සෞඛ්ය සංවිධානයේ ජ්යෙෂ්ඨ උපදේශක විශේෂඥ වෛද්ය පාලිත අබේකෝන්, මහාචාර්ය සේනක පිලපිටිය, ආයුර්වේද කොමසාරිස් ජනරාල් දීප්ති සුමනසේන මහත්මිය ඇතුළු ක්ෂේත්රයේ ප්රවීණයන් රැසක් එක්ව සිටියහ.
