ඌන සේවා උපාධිධාරීන්ට සහ පුරාවිද්යා උපාධිධාරීන්ට ද ගුරු සේවයට එක්වීමට ඇති නීතිමය බාධා ඉවත් කර වහාම අවස්ථාව ලබා දෙන ලෙස විපක්ෂ නායක සජිත් ප්රේමදාස මහතා රජයෙන් ඉල්ලා සිටියි. අධ්යාපනය පිළිබඳ ආංශික අධීක්ෂණ කාරක සභාව හමුවේ අදහස් දක්වමින් ඔහු පෙන්වා දුන්නේ, රාජ්ය සේවයේ පහළම ශ්රේණිවල සේවය කරමින් පශ්චාත් උපාධි දක්වා සුදුසුකම් සපුරා ඇති ඌන සේවා උපාධිධාරීන්ට ගුරු සේවයට ඒමට ඇති අවස්ථාව පුළුල් කළ යුතු බවයි. එසේම, පුරාවිද්යා උපාධිධාරීන්ට වර්තමාන චක්රලේඛ අනුව ඉතිහාසය විෂය ඉගැන්වීමට නොහැකි වී ඇති බැවින්, එම තත්ත්වය ද සංශෝධනය කර ඔවුන්ට සාධාරණය ඉටු කරන ලෙස විපක්ෂ නායකවරයා මෙහිදී අවධාරණය කළේය.
ගුරු බඳවා ගැනීමේ විවෘත පදනම යටතේ උපාධියේ වලංගු දිනය 2026 මාර්තු 05 දක්වා දීර්ඝ කිරීමට රජය ගත් පියවර අගය කළ ඔහු, සීමිත පදනම යටතේ වන බඳවා ගැනීම්වල පවතින 2023.02.10 වන දින සීමාව ද ඒ හා සමානව දීර්ඝ කරන ලෙස රජයෙන් වැඩිදුරටත් ඉල්ලා සිටියේය.
