නොරොච්චෝල ගල්අඟුරු බලාගාරයට දැනට ගෙන්වනු ලබන බාල ප්රමිතියෙන් යුත් ගල්අඟුරු හේතුවෙන් බලාගාරයේ යන්ත්ර සූත්රවලට බරපතළ හානි සිදුවීමේ හා රටම දැඩි විදුලි අර්බුදයකට ඇද දැමීමේ අවදානමක් පවතින බව බලශක්ති විශ්ලේෂක විදුර රළපනාව මහතා පවසයි. දැනට ගොඩබානු ලබන නවවැනි ගල්අඟුරු නැව ඇතුළු මෑතකදී පැමිණි නැව් කිහිපයකම ප්රමිතිය ඉතා පහත් මට්ටමක පවතින බව පෙන්වා දෙන ඒ මහතා, ඉන්දියාවේ ‘ට්රයිඩන්ට් කෙම්පර්’ නමැති ආයතනය විසින් සිදුකරන මෙම සැපයුම් නිසා පාරිභෝගිකයාට සහ රජයට රුපියල් මිලියන 1300ක පමණ අලාභයක් සිදුවනු ඇතැයි ගණන් බලා ඇත. පළමු නැව සම්බන්ධයෙන් බාල ප්රමිතිය තහවුරු වී රුපියල් මිලියන 640ක දඩයක් නියම කළද, ඉන් පසුව පැමිණි බාල නැව්වල වාර්තා “සමත්” ලෙස ඉදිරිපත් කිරීම පිටුපස බරපතළ ගැටලුවක් පවතින බව ද ඔහු අනාවරණය කළේය.
ප්රමිතියෙන් තොර ගල්අඟුරු භාවිතය නිසා බලාගාරයේ බොයිලේරු නළ (Boiler tubes) පිපිරීම වැනි දරුණු හානි සිදුවිය හැකි අතර, එවැනි තත්ත්වයක් යටතේ යන්ත්රයක් යථා තත්ත්වයට පත් කිරීමට සති දෙකක සිට මාස හයක පමණ කාලයක් ගතවිය හැකිය. පවතින වියළි කාලගුණයත් සමඟ ජල විදුලි උත්පාදනය සීමා වී ඇති පසුබිමක, නොරොච්චෝල බලාගාරය අක්රිය වුවහොත් සමස්ත විදුලි පද්ධතියම බිඳ වැටෙනු ඇත. ටෙන්ඩර් කොන්දේසි ප්රකාරව අදාළ සැපයුම්කරුගේ ගිවිසුම අවලංගු කිරීමට අවස්ථාව තිබුණද, බලධාරීන් ඒ පිළිබඳව නිසි ක්රියාමාර්ගයක් නොගැනීම සම්බන්ධයෙන් රළපනාව මහතා සිය දැඩි විරෝධය පළ කරයි.
